5 ნოემბერს კომპოზიტორი ნუნუ დუღაშვილი 93 წლის ასაკში გარდაიცვალა.
სამწუხარო ამბავს სოციალურ ქსელში მომღერალი ზურა ხაჩიძე ეხმაურება და კომპოზიტორს ემოციურად იხსენებს:
„დიდი ქართველი კომპოზიტორი, ქალბატონი ნუნუ დუღაშვილი დაგვაკლდა!
მისი უკვდავი სიმღერები ყოველთვის დარჩება ქართული მუსიკის ისტორიაში და თითოეული ჩვენგანის გულში.
ქალბატონო ნუნუ, თქვენი შემოქმედება არასოდეს დაგვავიწყდება!
ვუსამძიმრებ ოჯახს, ახლობლებსა და სრულიად საქართველოს ამ დიდ დანაკარგს.
ნათელი და მარადიული ხსოვნა თქვენს სულს!“, - წერს ზურა ხაჩიძე.
ცნობისთვის, ნუნუ დუღაშვილი დაიბადა 1933 7 თებერვალს. იგი იყო ქართველი კომპოზიტორი, მომღერალი. საქართველოს სსრ ხელოვნების დამსახურებული მოღვაწე (1983), თბილისის საპატიო მოქალაქე (2004).
1959 წელს დაამთავრა თბილისის ვანო სარაჯიშვილის სახელობის სახელმწიფო კონსერვატორია. 1959-1962 წლებში მუშაობდა კინოსტუდია „ქართული ფილმის“ დოკუმენტური ფილმების სტუდიაში მუსიკალურ რედაქტორად.
1962 წლიდან ეწეოდა პედაგოგიურ მოღვაწეობას ზაქარია ფალიაშვილის სახელობის მუსიკალურ ათწლედში. 1965-2002 წლებში - საქართველოს ტელევიზიის მუსიკალური გაფორმების განყოფილების უფროსი იყო. ძირითადად მუშაობს სიმღერის ჟანრში.
პოპულარობა მოიპოვეს სიმღერებმა: „ქუთაისო“, „იმერეთის ნიავი“, „ღმერთი სიყვარულისა“, „ბათუმი რად ღირს, მარტო“, „ჩემი სიმღერა“, „კახეთო“, „სამშობლო“, „თბილისო, სიყვარულო“.
დაწერილი აქვს ასევე საფორტეპიანო კონცერტი, საფორტეპიანო სონატა, მუსიკა დოკუმენტური და სატელევიზიო, აგრეთვე თოჯინური ფილმებისათვის. 2012 წელს დიდი საკონცერტო დარბაზის წინ გაიხსნა მისი ვარსკვლავი.
⭕ ასევე დაგაინტერესებთ:
⭕ შიშის მიღმა: როგორ გადავდგათ ნაბიჯი საკუთარი ძალისკენ - ნინი დგებუაძე
