მოდელი ლიკუნა მეტრეველი ორი შვილის დედაა და პატარებზე ზრუნვასთან ერთად, კარიერული წინსვლისთვისაც ბევრს შრომობს. ლიკუნა პროფესიით იურისტია. ვნახოთ, რამ ითამაშა უფრო დიდი როლი მის წარმატებაში – იღბალმა თუ შრომისმოყვარეობამ.
ლიკუნა მეტრეველი: იღბალი და შრომისმოყვარეობა – ორივე თანაბრადაა საჭირო წარმატების მისაღწევად. თუმცა, ვფიქრობ, რომ შრომისმოყვარეობაზე მაინც მეტია დამოკიდებული. თუ დასახული მიზნისთვის ყველაფერს გააკეთებ, მეტი შანსია, შედეგს მიაღწიო. თუ ფიქრობ, რომ წარმატებული და შემდგარი ადამიანი ხარ, მაშინვე გიჩნდება განცდა, რომ შენ ეს შეძელი და ამ მხრივ, ნამდვილად იღბლიანი ვარ.
– ოჯახისთვის უფრო მეტს შრომობ თუ კარიერისთვის?
– ძალიან მიყვარს ბალანსი და ყველაფერში ვცდილობ მის პოვნას. ყოველთვის არ გამოდის, მაგრამ მე მაინც ვცდილობ. უფრო მეტ შრომას ოჯახში ვდებ, იმიტომ, რომ ორი შვილი მყავს და ბავშვებთან ურთიერთობას ძალიან დიდი მნიშვნელობა აქვს. თუმცა, ვერ ვიტყვი, რომ კარიერას რამეს ვაკლებ. მთელი ჩემი ცხოვრება ასეა. თუ საქმეში უფრო მეტს ჩადებ, შეიძლება, უკეთესი კარიერა გქონდეს ან თუ ოჯახში ჩადებ მაქსიმუმს, იქ კიდევ უფრო კარგად გქონდეს ყველაფერი, მაგრამ მგონია, რომ რადიკალიზმი და მხოლოდ ერთი კუთხით განვითარება არ არის საკმარისი კარგად ყოფნისა და ბედნიერებისთვის. კარიერაც უნდა გქონდეს, პირადი სივრცეც და ოჯახიც.
– რამდენად გაგიმართლა მეორე ნახევარში?
– ვასო არის ადამიანი, რომელიც ყოველთვის ხელს მიწყობს განვითარებაში. კარგი კუთხით, ჩემი წამქეზებელია – რატომაც არა, შენ ეს შეგიძლია, შენ ამას გააკეთებ და ასე შემდეგ, მისგან ასეთი სიტყვები ხშირად მომისმენია და ეს ჩემთვის ძალიან ბევრს ნიშნავს. აქედან გამომდინარე, მეორე ნახევარში ნამდვილად გამიმართლა.
– ცვლილებები...
– რადიკალურ ცვლილებებთან დაკავშირებით გადაწყვეტილებას ძალიან რთულად ვიღებ. თმის ფერის შეცვლაზე და შეჭრაზეც კი ორი წელი მაინც უნდა ვიფიქრო და მერე გადავდგა ნაბიჯი. მე ვიზუალში კორექტივების შეტანა ძალიან მიჭირს, მაგრამ ვფიქრობ, რომ თუ ადამიანს ცვლილებების სურვილი აქვს, ეს აუცილებლად უნდა გააკეთოს. ჯერ მე ეს პერიოდი არ დამდგომია, თუმცა ძალიან მინიმალური ჩარევებისთვის მიმიმართავს. მაგალითად, ბიორევიტალიზაცია გავიკეთე, კანის მოვლაზე აღარაფერს ვიტყვი, რადგან დღეს მგონია, რომ მხოლოდ ქალები კი არა, კაცებიც ძალიან აქტიურად უვლიან თავს. რამდენიმე თვის წინ ბოტოქსი გავიკეთე, მაგრამ ისეთი პრეპარატით, რომ მიმიკა შემნარჩუნებოდა. ძალიან ემოციური ადამიანი ვარ და საუბრისას ყველა ემოცია სახეზე მეტყობა, ამიტომ მიმიკური ნაოჭები მქონდა. ამ გადაწყვეტილების მისაღებად ერთი წელი დამჭირდა, ბოლოს მაინც გადავდგი ეს ნაბიჯი და ძალიან ბედნიერი ვარ (იცინის).
აგრეთვე დაგაინტერესებთ:
🎥 70 წლამდე პედაგოგმა 14 წლის ბავშვს სცემა - შოკის მომგვრელი კადრები
🎥 შალვა რამიშვილი სკანდალურ ბრალდებაზე პირველ კომენტარს აკეთებს - „არ ვიცნობ ეგეთ ადამიანს“
წყარო: tbiliselebi.ge
