რესპუბლიკური საავადმყოფოს კლინიკურმა დირექტორმა დევი ტაბიძემ და ჯოენის სამედიცინო ცენტრის ეპიდემიოლოგმა მაია კაშიამ „იმედის“ ეთერში ეპიდემიოლოგიურ მდგომარეობაზე ისაუბრეს. სპეციალისტები მოსახლეობას კიდევ ერთხელ ვაქცინაციისკენ და რეკომენდაციების დაცვისკენ მოუწოდებენ.
ექიმის თქმით, ქვეყანაში ყველანაირი რეკორდი მოხსნილია და მეექვსე ტალღის პიკურ მაჩვენებლებს ვუახლოვდებით.
„ყველანაირი ანტირეკორდი მოხსნილია, შეიძლება ითქვას, მას შემდეგ, რაც ქვეყანაში პანდემია დაიწყო. ვუახლოვდებით მეექვსე ტალღის პიკურ მაჩვენებლებს. სამწუხაროდ, ჩვენს ქვეყანაში პანდემია გაგრძელდება იმაზე უფრო მეტ ხანს, ვიდრე სხვა ქვეყნებში, რადგან ჩვენთან ვაქცინირებულია მოზარდი მოსახლეობის დაახლოებით 45%-მდე, რაც რეალურად არის ძალიან დაბალი რიცხვი“, - აცხადებს მაია კაშია.
რესპუბლიკური საავადმყოფოს კლინიკური დირექტორის თქმით, აცრა არის ერთადერთი გზა იმის, რომ გადავრჩეთ და არ მოვხვდეთ ჰოსპიტალში.
„24 ათასი ახალი შემთხვევა არ არის სრული სურათი. გაცილებით უფრო მეტია, შეიძლება სამჯერ-ოთხჯერ მეტი შემთხვევაა. აცრა არის ერთადერთი გზა იმის, რომ ჩვენ არ მოვხვდეთ ჰოსპიტლებში და მსუბუქად გადავიტანოთ ამ შემთხვევაში არსებული ნებისმიერი ტიპის ვირუსები“, - აღნიშნა დევი ტაბიძემ.
ასევე დაგაინტერესებთ👇
🔵VIDEO: „მადლობა ჩვენი ბავშვობისთვის“ - გივი წიქარიძე გარდაცვლილა
🔵„თქვენკენ როგორაა საქმე ამ მიმართულებით, კოლეგებო?“ - რას წერს ბაკურ ბაკურაძე
