ჯანდაცვის მინისტრის მოადგილის თამარ გაბუნიას განცხადებით, თბილისსა და რეგიონების მასშტაბით, ამ ეტაპზე, 5 745 საწოლია მობილიზებული, რაც მისივე თქმით, სავსებით საკმარისია იმისთვის, რომ დატვირთვას გაუძლოს.
თამარ გაბუნია ასევე განმარტავს, რომ იმ შემთხვევაში, თუ ინფიცირების შემდგომი მატება სწრაფი, ინტენსიური ტემპით გაგრძელდება, ბუნებრივია საწოლფონდის კუთხით, შესაძლოა, პრობლემა შეიქმნას.
„ამ დროისთვის, მობილიზებულია 5 745 საწოლი თბილისსა და ყველა სხვა რეგიონში. მეტი დატვირთვა ბუნებრივია შემთხვევების მაღალი რაოდენობის გამო არის თბილისში და სხვა დიდ ქალაქებში - ქუთაისი, ბათუმი. რა თქმა უნდა, შემთხვევების მაღალი მატება გვაქვს, რაც არ არის გასაკვირი იმ მაღალი მობილობიდან გამომდინარე, რომელიც ამ პერიოდში შეინიშნება. ჰოსპიტალურ სექტორს მობილიზებული სტატუსი არ შეუწყვეტია მთელი ამ პერიოდის განმავლობაში. მინდა შეგახსენოთ ნოემბერ-დეკემბრის პერიოდში, როდესაც ჩვენ გვქონდა აქტიური შემთხვევა 33 000, დაახლოებით მობილიზებული იყო 7 500 საწოლი. დღევანდელი ამ მდგომარეობით, როდესაც ჩვენ გვაქვს 2 000-მდე შემთხვევა, 18 000 აქტიური შემთხვევაა მიმდინარე პერიოდში და მობილიზებულია 6 000-მდე საწოლი, რაც ამ ეტაპზე სავსებით საკმარისია იმისთვის, რომ დატვირთვას გაუძლოს, თუმცა რა თქმა უნდა საყურადღებოა შემდგომი მატება და თუ ეს იქნა სწრაფი და ინტენსიური მატება, ბუნებრივია საწოლფონდის კუთხით პრობლემები შესაძლებელია შეიქმნას. ასევე მინდა დავაფიქსირო ის გარემოებაც, რომ გასულ პერიოდში ჩვენ აქტიურად ვიყენებდით სასტუმროების საწოლფონდს. მიმდინარე პერიოდში, ტურიზმის განვითარებიდან გამომდინარე, სასტუმროების საწოლფონდი ნაწილობრივ არის მობილიზებული და ახლა აქტიურად მიდის მუშაობა იმასთან დაკავშირებით, რომ საწოლფონდი მობილიზდეს," - განაცხადა თამარ გაბუნიამ.
✅ასევე დაგაინტერესებთ:
„გადავედით წითელ ზონაში, რაც განგაშის ერთ-ერთი მთავარი მოცემულობაა“ - ამირან გამყრელიძე
ციციშვილის კლინიკაში კიდევ ერთი კოვიდინფიცირებული ჩვილი გარდაიცვალა
