დღეიდან მზე სასწორის ნიშანში გადაინაცვლებს, ამ მოვლენას ზოდიაქოს სხვადასხვა ნიშნები ინდივიდუალურად იგრძნობენ, თუმცა მთელი თვის მთავარი გამოწვევა ურთიერთობაში ბალანსი და დიპლომატიის გამოვლინება იქნება.
უფრო კონკრეტულად თუ რომელი თარიღი რისთვის იქნება მნიშვნელოვანი, ამ საკითხზე საკუთარი მოსაზრება ასტროლოგმა დავით ნიბლაძემ გამოაქვეყნა, რომელსაც „დაიჯესტი“ უცვლელად შემოგთავაზებთ:
„2 სექტემბრის 23:21 საათიდან მზე სასწორში იმოძრავებს - ამავე დროს ეს არის შემოდგომის ბუნიობის დღე და ახალი სეზონის დასაწყისი.
♎სასწორი ჰარმონიას, ბალანსს, სამართლიანობასა და ურთიერთობებს უკავშირდება. მთავარი თემაც მომდევნო ერთი თვის განმავლობაში სწორედ ბალანსი იქნება ურთიერთობებში. კომპრომისი, თანამშრომლობა და ურთიერთგაგებაა სასწორის თემები.
ეს ნიშანი მშვიდობისმყოფელია, თუმცა ცხოვრება ბალანსის დამყარების პროცესში ყოველთვის მშვიდი არ არის. მზის სასწორში ტრანზიტის დროს გაცილებით რთულია გადაწყვეტილების მიღება. სასწორის სურვილი, ნებისმიერი სიტუაციის ორივე მხარე აწონ-დაწონოს, ხანდახან დაუსრულებელ პროცესად იქცევა. თუ ჩამოუყალიბებლობას, ხელოვნურობასა და პასიურ აგრესიას გავაკონტროლებთ და ამავე დროს, მეტად გამოვიყენებთ დიპლომატიასა და ტაქტიანობას, ეს პერიოდი სწორედ ჰარმონიის მიღწევასა და ბალანსის აღდგენაში დაგვეხმარება.
სასწორში ტრანზიტისას მზე რამდენიმე მნიშვნელოვან ასპექტს შექმნის
30 სექტემბერს სატურნთან ტრინი ხელს შეგვიწყობს, თვალი გავუსწოროთ რეალობას, უფრო მეტი პრაქტიკულობა შემოვიტანოთ ცხოვრებაში და გავიაზროთ ჩვენი პასუხისმგებლობა.
8-9 ოქტომბერს მზის შეერთებები მარსთან და რეტროგრადულ მერკურთან გაზრდის მენტალური დაპირისპირებების ალბათობას, რაც შესაძლოა, ფიზიკურ აგრესიასა და კონფლიქტებშიც გადაიზარდოს. ამას დაემატება მთვარის (მორიელი) ოპოზიცია ურანთან (კურო), რაც კიდევ უფრო გაზრდის ემოციური თავშეუკავებლობის ტენდენციას. ამიტომ ამ და მიმდებარე დღეებში განსაკუთრებული სიფრთხილის გამოჩენა მოგვიწევს.
15 ოქტომბერს მზის იუპიტერთან ტრინი ასე თუ ისე დააბალანსებს სიტუაციას, მეტი თავდაჯერებულობა, ოპტიმიზმი და რწმენა ბევრი სწორი და სასარგებლო გადაწყვეტილების მიღებაში დაგვეხმარება. ამ დროს რეკომენდებულია კრეატიული პროექტებისა და სწავლის დაწყება. ნაყოფიერი იქნება ასევე საელჩოებთან და უცხოელ პარტნიორებთან კავშირი.
17 ოქტომბერს მზის კვადრატი პლუტონთან გაზრდის დაუმორჩლებლობისა და ძალაუფლების გადამეტების ტენდენციას. ყურადღება უნდა მოვაქციოთ ასევე ახალ და სავსე მთვარეებს.
6 ოქტომბერს ახალი მთვარე მჭიდრო შეერთებაშია მარსთან, რაც ფაქტობრივად, მთლიანად ოქტომბერს კონფლიქტებითა და აგრესიით დამუხტავს.
20 ოქტომბერს სავსე მთვარე ისევ მარსთან იქნება დაძაბულ ასპექტში, რომელსაც უკვე პლუტონთან კვადრატიც დაემატება. საერთო სურათი ოქტომბერში საკმაოდ დაძაბული და ფეთქებადსაშიშია იმდენად დიდია აგრესიის, კონფლიქტებისა და დაპირისპირებების ალბათობა, დიდი ძალისხმევის გამოჩენა მოგვიწევს სასწორისეული სიმშვიდისა და ჰარმონიის მისაღწევად. ნუ ვიმოქმედებთ იმპულსურად, ემოციურ ფონზე ნუ გადავდგამთ ნაბიჯებს და ნებისმიერ სიტუაციაში ცივი გონებით ვიმოქმედოთ“, - წერს ნიბლაძე.
აგრეთვე დაგაინტერესებთ:
🔵„საიდან არის ამდენი დაავადება ბავშვებში? საკუთარი ხელით მოვწამლეთ საკვები და ჰაერი“
🔵მზე სასწორის ზოდიაქოში გადადის - ვინ იქნება შემდეგი თვის 3 ფავორიტი ნიშანი
