ბოდორნას მინდვრებში, თბილისიდან 43 კილომეტრის დაშორებით, იქ, სადაც გლეხებს სიმინდი მოჰყავთ, უამრავი თეთრი ძროხა და სხვა შინაური ცხოველი ბალახობს.
ერთ დღეს, აქაურობა უცნაურად დადუმდა, განცალკევებით მდგარი აკაცია კი საშინელი ტრაგედიის მოწმე გახდა - მოკლეს ნინო ჯავახიშვილი, მკვლელობაში მთავარი ეჭვმიტანილი კი მისი მეუღლე, გენადი ლოთიკაშვილია.
ამის შესახებ ინფორმაციას პროექტი „ფემიციდი - ქალთა მიმართ ძალადობის მონიტორინგი“ ავრცელებს.
ლოთიკაშვილმა სიცოცხლე თვითმკვლელობით დაასრულა.
საღამოს მწყემსებმა, რომლებიც ძროხებს შინისკენ მიერეკებოდნენ, ხის ქვეშ ორი ცხედარი იპოვეს.
მათი ნაამბობის მიხედვით, აკაციის ქვეშ სხეული ეგდო. კაცი კი, ჩამომხრჩვალი, ხის ტოტზე ეკიდა.
გავრცელებული ხმებისა და თავდაპირველად გაჟღერებული ვერსიის მიხედვით, ქმარმა ცოლი გაგუდა, შემდეგ კი კანაფის თოკის საშუალებით თავი ჩამოიხრჩო.
მოწმეთა თქმით, მან კანაფის ღეროებისგან თოკი თვითონ შეკრა.
„მთაში მწყემსად, დაახლოებით, 11 წელია, დავდივარ, მაგრამ ასეთი საზარელი ტრაგედია არასდროს მინახავს, - აღნიშნა ერთმა მოწმემ, - ამ მინდვრებზე ახალგაზრდებს უყვართ სიარული, ხშირად ანთებენ კოცონს და ქეიფობენ“.
ოფიციალური ვერსია ბუნდოვანია, დუშეთის ადგილობრივი მთავრობაც იმავე ინფორმაციას ავრცელებს, რაც ბოდორნისა და არაგვისპირის მცხოვრებლებს აქვთ.
მერიის წარმომადგენელი ნაირა ჯავახიშვილი აცხადებს, რომ ისინი პოლიციისა და ოფიციალური სამედიცინო კვლევის მონაცემებს ენდობიან და რომ მკვლელობაში მთავარი ეჭვმიტანილი ქმარია.
ცოლ-ქმარი ერთად 15 წელიწადს ცხოვრობდა და სამი შვილი ჰყავდათ.
„ქალი 15 წლის იყო, როცა დაინიშნა. შეყვარებულები ერთმანეთს დუშეთში ხვდებოდნენ“, - ამბობდა მეზობელი.
მისი გადმოცემით, ბიჭი ზაფხულის არდადეგებზე ბოდორნაში ჩადიოდა, რომელიც არაგვისპირის გვერდით მდებარე სოფელია.
სიყვარულის საიდუმლო - ამ ტრაგედიის სიმბოლოდ ეს სიტყვები იქცა.
იმ ადამიანების უმრავლესობა, რომლებიც იცნობდნენ ცოლ-ქმარს, ფიქრობენ, რომ მათ მშვიდი, უკონფლიქტო ურთიერთობა ჰქონდათ, ძალადობის, დაძაბულობის ნიშნების გარეშე.
„წლების განმავლობაში იყვნენ შეყვარებულები და ბედნიერი ოჯახური ცხოვრება ჰქონდათ. არავინ იცის, რატომ დაემართათ ასეთი რამ. თან წაიღეს თავიანთი სიყვარულის საიდუმლო“, - ამბობდა გარდაცვლილი ქმრის მეზობელი, ლალი შიუკაშვილი.
ჯუმბერ ყარსიმაშვილი, რომელიც ცოლ-ქმრის საზაფხულო სახლთან ახლოს ცხოვრობდა, ამბობდა:
„ლოთიკაშვილების ოჯახს 45 წელია, ვიცნობ, არასდროს არ გამიგია, კონფლიქტი ჰქონოდათ. დაქორწინდნენ, რადგან ერთმანეთი ძალიან უყვარდათ და ოჯახის შექმნა ამ გრძნობის ლოგიკური შედეგი იყო, არც ძალდატანება ყოფილა, არც მბრძანებლობა, ძალადობა ქალზე“.
თუმცა, ბოდორნის ერთი მცხოვრები ფიქრობს, რომ არსებობს გაყრის თემაც, რაც შესაძლოა გამხდარიყო კიდეც მკვლელობის მოტივი.
„ქალს საზღვარგარეთ სურდა წასვლა, ქმარი კი წინააღმდეგი იყო. გაყრილებიც იყვნენ, მაგრამ აქ მოდიოდნენ ხოლმე, დაძაბულობა ოჯახის დანარჩენი წევრებისთვის შეუმჩნეველი რომ დარჩენილიყო“, - ამბობდა ქმრის მეზობელი, ბიჭია ბერბერაშვილი.
მას არ უთქვამს, სად წავიდა ცოლი ქმართან დაშორების შემდეგ. ურთიერთსაწინააღმდეგო და ბუნდოვანი ვერსიების გამო მკვლელობის ეს ამბავი კიდევ უფრო ჩახლართული და რთულად ამოსახსნელი ჩანს.
ცოლის ოჯახის წევრები უარყოფენ გაყრის თემას და დასძენენ, რომ გარდაცვლილებს ერთმანეთი ძალიან უყვარდათ.
ქმრის ოჯახმა ყოველგვარი ინფორმაციის გაცემაზე უარი თქვა, საკუთარი მოსაზრება გამოთქვა მხოლოდ ერთ-ერთმა ბიძამ, რომლის თქმითაც, ცოლ-ქმრის ურთიერთობა არც ისეთი სრულყოფილი და იდეალური იყო, როგორც გარედან ჩანდა.
„ზოგჯერ ჩხუბობდნენ კიდეც და არაფერი ხდებოდა უმიზეზოდ. გარდაცვლილი ქალის სხეული მოშავო და მოლურჯო ლაქებით იყო დაფარული. როგორც ჩანს, ქმარმა მოკლა, მერე კი ინანა და გადაწყვიტა, თვითონაც თავი მოეკლა“, - ამბობდა ვალიკო ლოთიკაშვილი.
„გვიჭირს ამ ტრაგედიასთან შეგუება, - ამბობდა გარდაცვლილი ქალის ძმა, გიორგი ჯავახიშვილი, - მათ ერთმანეთი უყვარდათ და ასეთი რამის დაშვება, რაც მოხდა, შეუძლებელია. ალბათ, ჰქონდა ამ ყველაფერს მიზეზი, რომელსაც გამოძიება მიაგნებს. რაც ეხება პრობლემებს, მცირე კონფლიქტი და დაძაბულობა ყველა ოჯახშია“.
31 წლის ნინო ჯავახიშვილი ხუთშვილიან ოჯახში მესამე ქალიშვილი იყო.
ტრაგედიამდე ნინო ჰიპერმარკეტ კარფურში მოლარედ მუშაობდა, სადაც 2017 წლის საუკეთესო გამყიდველად დაასახელეს.
მეგობრები ამბობდნენ, რომ ნინო სულ იღიმოდა.
მის 37 წლის ქმარს საკუთარი ბიზნესი ჰქონდა - სამშენებლო მასალების დისტრიბუციის განხრით. მეგობრების თქმით, მსუბუქი, არააგრესიული ადამიანი იყო და სულ მუშაობდა.
არც ჯანმრთელობის პრობლემები ჰქონდათ.
ორივეს აღწერდნენ, როგორც მოსიყვარულე, კეთილ, გულღია, პატიოსან ადამიანს. ბევრი ფიქრობს, რომ ლოთიკაშვილი ადამიანს ვერ მოკლავდა.
გარდაცვლილის მეგობრებიც მას ჩუმ, თბილ ადამიანად ახასიათებენ, თუმცა კი, ზოგჯერ, სტუმრების თანდასწრებით ცოლის გაკრიტიკება უყვარდა.
გარდაცვლილის მეჯვარე, ნინო ხმალაძე ამბობდა:
„მის მკვლელობაში ეჭვმიტანილს ბავშვობიდან ვიცნობ. ძალიან სერიოზული, გაწონასწორებული ადამიანი იყო, არ სვამდა და არც ხმამაღალი საუბარი და სიცილი უყვარდა, ნინოს კრიტიკა კი ნამდვილად იცოდა. როგორც ამბობენ, „ქართველი კაცი“ იყო. ბადაგონის ღვინის კომპანიაში მისი ყოფილი კოლეგის, ნათია ჯვარიძის თქმით, „ჯავახიშვილი სულ გატაცებით ლაპარაკობდა შვილებზე და ქმარზე. სურდა, ხშირად გაეკეთებინა ქმრისთვის სიურპრიზი, საჩუქრები ეყიდა“.
ისინი ერთად მუშაობდნენ ღვინის კომპანია „ბადაგონში“.
მათი სამი შვილი ახლა ბებიებთან და ბაბუებთან იზრდება.
შინაგან საქმეთა სამინისტროს მონაცემებით, გამოძიება სისხლის სამართლის კოდექსის 108-ე და 115-ე მუხლების გათვალისწინებით მიმდინარეობს, რაც გულისხმობს განზრახ მკვლელობასა და თვითმკვლელობამდე მიყვანას.
⭕ აგრეთვე წაიკითხეთ:
🔵გოგონას ყელი ბასრი საგნით ჰქონდა გამოჭრილი და ზურგზე დიდი ლოდი ედო - გაუხმაურებელი ამბავი
🔵„მიყვარდა და იმიტომ მოვკალი“- ყოფილ ცოლს სცემა და შემდეგ ქვა ჩაარტყა - გაუხმაურებელი ამბავი
