შემოქმედელი მიტროპოლიტი იოსები საქართველოს ყოფილ პრეზიდენტს მიხეილ სააკაშვილს მიმართავს. როგორც მიტროპოლიტი აღნიშნავს, სააკაშვილი ახლა ისეა ახლოს ღმერთთან, როგორც არასდროს.
ამასთან, მიტროპოლიტ იოსების მიმართვის ადრესატია საქართველოს ხელისუფლებაც, მამა იოსები მთავრობას სთხოვს მიხეილ სააკაშვილი სათანადო სამკურნალო დაწესებულებაში გადაიყვანონ.
„მოკრძალებით მივმართავ ბატონ მიხეილ სააკაშვილს, საქართველოს მესამე პრეზიდენტს, თქვენ დღეს ისე ახლოს ხართ ღმერთთან, როგორც არასდროს. თქვენ დღეს ისეთ განსაცდელში ხართ, საკმარისია, ღმერთს სთხოვოთ და ილოცოთ სამშობლოსთვის, საქართველოსთვის, თქვენი თავისუფლებისთვის, ვფიქრობ, რომ ღმერთი მყისიერად შეგისრულებთ თქვენს თხოვნას. ლოცვას მთების გადაადგილება შეუძლია.
ასევე, დიდი მადლობა მინდა, გადავუხადო მეუფე ნიკოლოზს, რადგანაც მან აღასრულა უპირველესი მოვალეობა ქრისტიანისა, აღსარება ჩაიბარა ყოფილი პრეზიდენტიდან და ბოლოს აზიარა იესო ქრისტეს სისხლსა და ხორცს. ასევე, მინდა განვმარტო, რომ ადამიანისთვის, რომელიც ზის ციხეში ან საავადმყოფოშია, სრულებითაც არ არის სავალდებულო მარხვა, რადგანაც ყველაზე დიდი მარხვა განსაცდელია და მის მიმართ განკითხვა სრულიად უსაფუძვლოა.
უფალი ბრძანებს: როდესაც მოვალ მეორედ განსჯად ცხოველთა და მკვდართა, კაცობრიობას გავყოფ ორ ნაწილად, ერთს მარჯვნივ დავიყენებ, ხოლო მეორეს მარცხნივ ჩემსა. მარჯვნივ მდგომთ ვეტყვი: მოვედით ჩემდა კეთილმორწმუნენო, რამეთუ მშიერი ვიყავი, პატიმარი ვიყავი, ავადმყოფი ვიყავი, დევნილი ვიყავი და თქვენ მოხვედით ჩემდა, ნუგეში მეცით, გვერდში დამიდექით, დამეხმარეთ და დაიმკვიდრეთ ადგილი მამაჩემის მიერ თქვენდა გამზადებული, ხოლო მარცხნივ მდგომთ ვეტყვი: წარვედით ჩემგან ბოროტნო მონანო, რამეთუ მშიერ ვიყავი, საპატიმროში ვიტანჯებოდი, ავად ვიყავი, დევნილ ვიყავ, თქვენ კი არ მოხვედით, ნუგეში არ მომეცით, დამცინოდით, განმიკითხავდით და ასე შემდეგ. ამიტომ გეტყვით თქვენ, წარვედით ჩემგან ბოროტნო და წყეულნო მონანო გარესკნელსა.
ამიტომ, ამ სიტყვებიდან გამომდინარე, ღმერთი განსაკუთრებით იცავს და უსმენს იმ ადამიანს, ვინც განსაცდელშია, ვინც დევნილია სამშობლოსგან, ვინც ავადაა და სხვა…
ვაი, თქვენდა ფარისეველნო, სადუკეველნო და მწიგნობარნო, რამეთუ სასუფევლის კარებში დგახართ, არც თქვენ შედიხართ და არც სხვას არ აძლევთ უფლებას (ანუ აბრკოლებთ), რომ დაიმკვიდრონ სასუფეველი ღმრთისა.
მე კიდევ ერთხელ მინდა ვთხოვო ჩვენს საზოგადოებას, ხელისუფლებას, ჩემს საკუთარ თავსაც, გვეშინოდეთ ღმერთის, უფალი იესო ქრისტეს ამ სიტყვების გვეშინოდეს, რომ ჩვენ არ შეგვეხოს ღმრთის მრისხანება, და ძალიან ახლოს არიან ღმერთთან.
მოკრძალებით კიდევ ერთხელ გთხოვთ საქართველოს ხელისუფლებავ, გადაიყვანეთ ბატონი მიხეილ სააკაშვილი სათანადო სამკურნალო დაწესებულებაში, წინააღმდეგ შემთხვევაში, მძიმე მდგომარეობაში ჩავარდებით ყველა, მთელი საქართველო“ , - წერს სასულიერო პირი.
აგრეთვე დაგაინტერესებთ:
🔵ზოდიაქოს ნიშნები, რომლებსაც ყველაზე არასტაბილური ფსიქიკური მდგომარეობა აქვთ
🔵„აკონტროლეთ აგრესია და ეგოიზმი, არ ღირს უმიზეზოდ გაბრაზება“ - ცაგარელის დღის რჩევა
