მომღერალი ირმა სოხაძე სოციალურ ქსელში ქვეყანაში არსებულ რთულ ეპიდსიტუაციაზე საუბრობს და საზოგადოებას გაერთიანებისკენ მოუწოდებს.
„წელიწადზე მეტია, ამ თემაზე აღარაფერი დამიწერია, ჩავთვალე, რომ კამათს აზრი არა აქვს. ან საერთოდ, რა დროს კამათია, საკამათოდ გვაქვს საქმე? არა და, კამათი კი არა, ერთმანეთის დაუნდობელი ლანძღვა - თითქოს თვითმიზნად გვექცა! რატომ, რა გვემართება მეგობრებო, ნაცნობებო, უცნობებო, ჩვენ თავს რას ვუკეთებთ, ამას თუ ვხედავთ? ბავშვები ხომ არ ვართ, ვერაფრით გავაცნობიეროთ ის კატასტროფა, რომლის პირისპირაც ვიმყოფებით? ყოველდღე 5000-ზე მეტი ადამიანი ავადდება და ამ დროს კიდევ აცრის გაუგებარი ბოროტების აგიტაცია შეიძლება? ახლა ყველა, ეკლესიის წინამძღოლობით, მეცნიერების მხარეს უნდა დავდგეთ, საველე ჰოსპიტლების აპოკალიპტურმა სურათმა მაინც შეგვაჩეროს! ყოველდღე 50-ზე მეტი ადამიანი გვეღუპება! და ამ დიდი და მზარდი მსხვერპლის ნახევარი სწორედ ამ ყოვლად უპასუხისმგებლო ანტივაქსერების სინდისზეა! რატომ იღებენ თავის თავზე ასეთ სამარცხვინო და მძიმე ტვირთს, ასეთ საშინელ ცოდვას, თანაც ღმერთის სახელით, ღმერთის არ ეშინიათ? რატომ ახლა მაინც, არ ერთიანდება ერი და ბერი ამ საშიში მტრის წინააღმდეგ, რა გვინდა მეგობრებო, გავჯიუტდეთ და გავწყვიტოთ ერის დიდი და ხშირად, საუკეთესო ნაწილი (რომ წარმოვიდგენ იმ საოცარ ადამიანებს, ვინც არ აიცრა ან აცრა ვერ მოასწრო და კოვიდს შეეწირა, გული მეკუმშება), თუ გავაცნობიეროთ რეალობა და მაქსიმალურად შევებრძოლოთ? ძალიან გთხოვთ, თუ თქვენ მტკიცედ გაქვთ გადაწყვეტილი არ აიცრათ, აგიტაციას მაინც ნუ ეწევით და დამახინჯებული ფაქტების და საოცარი სიბნელის დემონსტრირებას ნუ მოახდენთ გაუგებარი ვიდეორგოლების გავრცელებით! ძალიან გთხოვთ" - წერს ირმა სოხაძე.
ასევე დაგაინტერესებთ👇
ქუთაისში ორსულს კოვიდის გართულების გამო ნაყოფი დაეღუპა
„კარგი, წყნარი ბიჭი იყო... თავში ჩაქუჩი ჩაარტყესო...“ - 42 წლის მამაკაცი ყელგამოჭრილი იპოვეს
