სიზმრები - ეს ის თემაა, რომელიც ინტერესს უძველესი დროიდან დღემდე ნებისმიერი კატეგორიის ადამიანებში იწვევს, შესაბამისად მის შესახებ მრავალი თეორია შეიძლება მოვიძიოთ და წავიკითხოთ. რელიგიაში მას ღმერთის გზავნილად განიხილავდნენ, ხშირად კი წინასწარმეტყველურ შინაარსებს მიაწერდნენ, რის გამოც სიზმარი მისტიციზმთან დღესაც ასოცირდება.
რეალურად კი სიზმარი ეს არის ძილის მდგომარეობაში უნებლიედ აღმოცენებული ფსიქიკური შინაარსები.
სიზმრების გაგებისა და ახსნის თვალსაზრისით ყველაზე მნიშვნელოვანი მოვლენა ზიგმუნდ ფროიდის მიერ 1900 წელს გამოცემული მონოგრაფია „სიზმრის ახსნა“ აღმოჩნდა. ფროიდის მიერ ქვეცნობიერის არსებობის ამოჩენამ გადატრიალება მოახდინა ფსიქოლოგიაში. მანამდე არსებული წარმოდგენა, რომ ცნობიერება აკონტროლებდა ადამიანის ქცევას, შეიცვალა და ფოკუსირება მოხდა არაცნობიერი იმპულსების გაგებაზე პიროვნების ფუნქციონირებაში. სწორედ ძილის დროს, როდესაც ადამიანის ნებითი კონტროლი გათიშულია, შეიძლება ადამიანის გაუცნობიერებელი ფსიქიკური შინაარსების გამოთავისუფლება და მათი შესწავლა.
ფროიდი სიზმარს ადამიანის არაცნობიერისკენ მიმავალი სამეფო გზას უწოდებს. ფსიქოანალიზი სიზმარში სიმბოლოების აღმოჩენას და მათ ახსნა-განმარტებას ცდილობდა, ფსიქოანალიტიკოსს კი ინფორმაციის ინტერპრეტაციისა და გაანალიზების ფუნქცია ეკისრებოდა.
სიზმრებისადმი განსხვავებულ მიდგომას გვთავაზობს გეშტალტ ფსიქოლოგია, რომლის მიხედვით სიზმარი პიროვნების შემოქმედებითობის ნაყოფი, ადამიანის ფსიქიკის ყველაზე სპონტანური გამოვლინება და პიროვნების ინტეგრაციის საუკეთესო საშუალებაა.
გეშტალტ თერაპია თვლის, რომ სიზმარში ნანახი ობიექტები და შინაარსები წარმოადგენენ არა თავად ამ ობიექტებს, არამედ სიზმრის ავტორის ჩადებულ შეხედულებას მათზე. ანუ რასაც ვხედავთ სიზმარში, ყველაფერი მხოლოდ და მხოლოდ მე-ს პროექციების ნაყოფია, ამიტომ გეშტალტ თერაპევტი ხშირად ამბობს: განასახიერე შენი სიზმრები და გაიგებ, თუ როგორი ხარ შენ.
არსებობს თუ არა სიზმრებით წინასწარმეტყველება, რა შეტყობინებებს გვიგზავნის ქვეცნობიერი სიზმრების საშუალებით და ზოგადად, რა არის სიზმარი, როდის და რატომ ვხედავთ მას - აღნიშნულ საკითხებზე გადაცემაში „შუადღე“ ფსიქოთერაპევტმა დიანა ნიკოლაიშვილმა ისაუბრა:
„სიზმარს ძალიან მნიშვნელოვანი როლი აქვს ადამიანის ცხოვრებაში უძველესი დროიდან. შამანიზმი ყველას გაგვიგია, სანამ რელიგია შემოვიდოდა ადამიანის ცხოვრებაში, იქამდე არსებობდნენ შამანები, რომლებიც გარკვეულწილად მართავდნენ ურთიერთობებს ადამიანს და სულიერ სამყაროს შორის.
თვითონ სიტყვა შამანი ითარგმნება, როგორც ის ვინც სიზმარს ხედავს. შამანი იყო პირველი ადამიანი, ვინც სიზმარს ყურადღებას აქცევდა და სიზმარში მიღებული გზავნილებით მართავდა ტომის ცხოვრებას.
ძილის დროს ჩვენი ფიზიოლოგიური პროცესები აქტიურდება, ეს ხდება ღამის განმავლობაში რამდენჯერმე. სწორედ ამ მონაკვეთში ვხედავთ ფერად სიზმრებს, ეს მეცნიერულად დამტკიცებულია“, - ამბობს დიანა ნიკოლაიშვილი.
ვრცლად, იხილეთ ვიდეო👇
ასევე დაგაინტერესებთ:
⭕აღმოსავლური ჰოროსკოპის 5 ნიშანი, რომელთათვისაც 2025 წლის აპრილი განსაკუთრებით წარმატებული იქნება
🎥 რა არ უნდა გავაკეთოთ ქორწილში? - რას ამბობს წვეულებების ცნობილი წამყვანი ემილი გოგუა
