„რას გვიმზადებს რეტროგრადული სატურნი ვერძში?. რეტროგრადული ფაზის დაწყება: 26 ივლისი (2026 წელი) რეტროგრადული ფაზის დასრულება: 11 დეკემბერი (2026 წელი)“, - აღნიშნულ საკითხზე ვრცელ პოსტს ასტროლოგი რამაზ გიგაური გვიზიარებს:
„სატურნი ასტროლოგიაში სტრუქტურის, დისციპლინის, წესრიგის, შეზღუდვების, შრომისა და კარმის პლანეტას წარმოადგენს. მითოლოგიურად ის უძველეს დროს მიწათმოქმედების ღვთაება იყო, თუმცა მოგვიანებით სატურნი დროის, კონკრეტულად კი ქრონოსის მმართველიც გახდა.
აღსანიშნავია, რომ სატურნი მხოლოდ დროის მდინარებას, ასე ვთქვათ, ხაზობრივ დროს მართავს - დროს, რომელიც ყველაფერს შთანთქავს. თუმცა, იმ ერთადერთ, გადამწყვეტ და ხელსაყრელ წამს განაგებს არა სატურნი (ქრონოსი), არამედ კაიროსი. როცა სატურნი რეტროგრადულ ფაზაში გადადის, „დრო ჩერდება“. ამ პერიოდში შინაგანი საათი ირთვება და ვხვდებით, რომ დაგროვილი შეცდომები უნდა გამოვასწოროთ.
სამყარო თითქოს შანსს გვაძლევს, დავიჭიროთ კაიროსი (ხელსაყრელი მომენტი) და წარსულში დაშვებული შეცდომები გამოვასწოროთ და ეს მომავლის საძირკვლად ვაქციოთ. ეს ურთულესი პერიოდი 26 ივლისს დაიწყება და 11 დეკემბრის ჩათვლით გაგრძელდება, როდესაც სატურნი ვერძის მე-15 გრადუსიდან მე-8 გრადუსის მიმართულებით იმოძრავებს.
🧠 ზოგადი ასტროფსიქოლოგიური ფონი ასტროლოგიურად, ვერძის ნიშანი სატურნისთვის ურთულესი, „დაცემის“ პოზიციაა. რატომ? სატურნს სჭირდება სტრუქტურა, მოთმინება, გეგმა და მკაფიო საზღვრები. ვერძი კი - სისწრაფის, აგრესიისა და იმპულსური მოქმედების ენერგიაა. როცა სატურნი ამ ცეცხლოვან ნიშანში ხვდება და თან უკან მოძრაობს, ის ერთგვარ კარმულ მუხრუჭად იქცევა.
წარმოიდგინეთ მანქანა, რომელიც მთელი სიჩქარით მიქრის და ამ დროს მძღოლი ხელის მუხრუჭს სწევს. ზუსტად ამ ფსიქოლოგიურ მდგომარეობაში გადავდივართ. ამ თვეების განმავლობაში ის საქმეები, რომელთა სწრაფად მიღწევაც გვინდოდა, მოულოდნელად ფერხდება. ეს შეფერხება კოსმიური სასჯელი არ არის. სამყარო მკაფიოდ „გვეუბნება“, რომ ის საძირკველი, რომელიც აქამდე ავაშენეთ, არამყარია. ამიტომ ის უნდა გაძლიერდეს და ბევრად უფრო მტკიცე გახდეს. ამ დროს აჩქარებულობა დამღუპველია და უდიდესი მნიშვნელობა ენიჭება დისციპლინასა და სისტემურ მოქმედებებს. როგორც პიროვნულ, ისე კოლექტიურ დონეზე დაგროვილი შინაგანი წინააღმდეგობა, ფარული ბრაზი და აგრესია იღვიძებს. ახლა მთავარია, ეს მძლავრი ენერგია არა ნგრევისკენ, არამედსაკუთარი ხასიათის გამოწრთობისა და შენებისკენ მივმართოთ.
🌍 მუნდანური ასტროლოგია: რა ხდება გლობალურ პოლიტიკურ ველზე? მუნდანურ (გლობალურ) დონეზე ვერძის არქეტიპი სამხედრო სტრუქტურებს, შეიარაღებულ ძალებს, ლიდერებსა და ომებს განაგებს. როცა სტრუქტურისა და შეზღუდვების პლანეტა ამ სფეროებში რეტროგრადულ სვლას იწყებს, პოლიტიკურ არენაზე სერიოზული კრიზისი იწყება.
ასე რომ, მოსალოდნელია:
⚔️ სამხედრო სტრატეგიების კოლაფსი: ის სამხედრო თუ პოლიტიკური კამპანიები, რომლებიც იმპულსურად და აგრესიულად დაიწყო, სერიოზულ წინააღმდეგობას წააწყდება. ძალისმიერ სტრუქტურებს უწევთ გაჩერება, რადგან რესურსები მცირდება და სტრატეგიის ძირეულად შეცვლა აუცილებელი ხდება. სწრაფი გამარჯვებების ილუზია საბოლოოდ იფანტება და ინგრევა. ეს განსაკუთრებით საგრძნობი გახდება რუსეთ-უკრაინის ომში, სადაც ომის ნეგატიური შედეგები რუსეთის უფრო მკაფიო და რაც მთავარია, ძალიან მტკივნეული გახდება. სატურნი - ეს ვერტიკალია, ამიტომ მოსალოდნელია სახელისუფლო ვერტიკალს სერიოზული საფრთხე დაემუქროს.
👑 ლიდერთა კრიზისი: ავტორიტარული ლიდერები, რომლებიც მხოლოდ ძალასა და აგრესიაზე დგანან, ურთულეს გამოცდას გადიან. მათი მმართველობის სტრუქტურა, რღვევას იწყებს. სისტემა, რომელიც მხოლოდ ეგოზეა აშენებული, სატურნის ტესტს „ვერ უძლებს“. როგორც განვითარებულ, ისე განვითარებად ქვეყნებში ავტორიტარულ და ავტოკრატიულ სისტემებს ურთულესი კრიზისი და გამოცდა ელით.
📜 ძველი კონფლიქტების გაღვიძება: ძალიან მაღალი ალბათობაა, რომ ახალი, აქტიური დაპირისპირებების ნაცვლად, დროებით დაკონსერვებული, მივიწყებული ტერიტორიული ან სამხედრო დავები წამოიჭრას. დაპირისპირებების შემთხვევაში კი ამას საკმაოდ აგრესიული ფორმა ექნება (ვერძის ენერგია).
⚖️ ელექციური ასტროლოგია: რა შეგვიძლია გავაკეთოთ და რა გამოვა რთულად? ეს პერიოდი მკაცრ წესებსა და რეგლამენტს უკავშირდება. სატურნი - ეს არის ჩარჩო, კანონი და წესრიგი. ვერძი კი არღვევს ყველანაირ წესრიგს. აქედან გამომდინარე, ამ ორი საპირისპირო ენერგიის სინთეზი ერთგვარ „ავარიულ“ სიტუაციებს ქმნის.
🛑 რა არ უნდა გავაკეთოთ: კატეგორიულად მოერიდეთ ახალი, სარისკო და აგრესიული ბიზნესის დაწყებას, სამსახურიდან ემოციურ ნიადაგზე წამოსვლას და დაუფიქრებელი სასამართლო პროცესების წამოწყებას. ეგოისტური, ცხელ გულზე მიღებული გადაწყვეტილებები დიდი ალბათობით სრული კრახით დასრულდება.
✅ რა უნდა გავაკეთოთ: ეს იდეალური დროა ძველი, გადადებული პროექტების გააქტიურებისთვის. დაუბრუნდით იმ საქმეებს, რომლებიც ოდესღაც მოთმინების ნაკლებობის ან სხვა პრობლემების გამო მიატოვეთ. დაიწყეთ ვარჯიში, გაიმაგრეთ ფიზიკური სხეული (განსაკუთრებით ძვლები, ხერხემალი, კბილები - რაც სატურნის სფეროა) და დისციპლინის გაძლიერებაზე აქტიურად იმუშავეთ.
🎯 ვისზე იმოქმედებს სატურნის ეს ფაზა ყველაზე მეტად? ეს ენერგია ყველაზე მძაფრად კარდინალური ნიშნებზე აისახება. თუ თქვენ გაქვთ მზე, მთვარე, ასცენდენტი ან სტელიუმი (სამი ან მეტი შეერთებული პლანეტა) ვერძის, კირჩხიბის, სასწორისა და თხის რქის ნიშნებში (განსაკუთრებით მე-7 გრადუსიდან მე-15 გრადუსამდე შუალედში), ეს რეტროგრადული ფაზა თქვენთვის სერიოზული კარმული გამოცდა იქნება. სასურველია ნელა და დაფიქრებით იმოქმედოთ, მართოთ ხასიათი და საკუთარ ქმედებებზე პასუხისმგებლობა სრულად აიღოთ“, - წერს რამაზ გიგაური.
⭕ ასევე დაგაინტერესებთ:
🎥 „უბრალოდ გადყლარწული, ლამაზი ამოსვლა მინდოდა“ - რა კადრებს აქვეყნებს ნუკი კოშკელიშვილი
