1988 წელს პოპის მეფე და „გულების დედოფალი“ ლონდონში პირველად შეხვდნენ ერთმანეთს. დღეს ვისაუბრებთ, თუ რატომ არ იმღერა ჯექსონმა Dirty Diana და რაზე საუბრობდნენ ისინი ტელეფონზე გვიან ღამემდე:
პოპ-კულტურის ისტორიაში არის მომენტები, რომლებიც უბრალოდ ფაქტებზე მეტია.
იმ საღამოს მაიკლ ჯექსონი თავისი მსოფლიო ტურნეს - Bad ფარგლებში გამოდიოდა. მისი შოუები ყოველთვის სანახაობრივი, მასშტაბური და ტექნოლოგიურად გამართული იყო. მაგრამ, ამჯერად ეს უბრალოდ დაუვიწყარი აღმოჩნდა - უელსის პრინცი და პრინცესა კონცერტს დაესწრნენ. ითვლება, რომ დიანა ჯექსონის შემოქმედების დიდი ხნის გულშემატკივარი იყო, განსაკუთრებით მისი ერთ-ერთი ჰიტი Dirty Diana უყვარდა. აღსანიშნავია, რომ ტრეკი პრინცესას საერთოდ არ ეძღვნებოდა. სიმღერაში აღწერილია გოგონა, რომელიც სცენის კართან თავის კერპებს ელოდება.
გადაწყვეტილება სწრაფად, კულისებში მიიღეს: სიმღერა შოუდან საერთოდ ამოიღეს. მოგვიანებით ჯექსონმა აღიარა, რომ მისი მოტივები წმინდა ეთიკური იყო: მას სურდა, ლედი დიანას მიმართ პატივისცემა გამოეხატა, რადგან სიმღერის სათაური შესაძლოა, საზოგადოებას ორაზროვნად გაეგო და რაიმე ფორმით პრინცესასთან დაეკავშირებინა. თუმცა, როგორც აღმოჩნდა, Dirty Diana დიანას საყვარელი სიმღერა იყო. როდესაც მან შეიტყო, რომ ის შოუდან ამოიღეს, განაწყენდა და მოითხოვა, რომ მისი საყვარელი ტრეკი აღედგინათ. თუმცა, შოუ იწყებოდა და სიმღერების სია უკვე შედგენილი იყო.
იმ საღამოს პრინცესა დიანა საყვარელ შემსრულებელს მაინც შეხვდა და კამერების გარეშე, რამდენიმე წუთის განმავლობაში ესაუბრა. მოგვიანებით, მათ პრინცი ჩარლზიც შეუერთდა.
მიუხედავად იმისა, რომ ეს ხანმოკლე შეხვედრა იყო, პოპის მეფემ და „გულების დედოფალმა“ კომუნიკაცია ამის შემდეგაც განაგრძეს. 1999 წელს მიცემულ ინტერვიუში ჯექსონმა თქვა, რომ დიანა მას ღამით ურეკავდა და მათი საუბრები სიტყვასიტყვით ყველაფერს და არაფერს ეხებოდა: ბავშვებს, პრესას, საზოგადოებრივი ცხოვრების სირთულეებს - ყველაფერს, რაც კი მათ აწუხებდათ.
„დიანა მენდობოდა. ის უბრალოდ მირეკავდა ტელეფონზე და ყველაფერზე ვსაუბრობდით, რაც მის ცხოვრებაში ხდებოდა. ის თავს დევნილად გრძნობდა, ისევე, როგორც მე. მას სჭირდებოდა ვინმე, ვინც მას გაუგებდა“,- თქვა ჯექსონმა ინტერვიუში.
როგორც ცნობილია, მათ ერთმანეთი განსაკუთრებით უყვარდათ და ერთმანეთს ყოველთვის გულშემატკივრობდნენ.
🔵 აგრეთვე დაგაინტერესებთ:
🔵რას ამბობს თქვენი სახლის ფერი თქვენზე - მეცნიერების თქმით, წითელი კედლები ცუდის მანიშნებელია
🔵 „ყოველთვის ყოფილიყოს მშვიდობა, სიყვარული და სითბო...“ - ნუცა ბუზალაძე გამომწერებს შობას ულოცავს
წყარო: www.beaumonde.ge
