ბოლო პერიოდში, საქართველოს პრემიერ-მინისტრ ირაკლი კობახიძეს თბილისის სახელმწიფო უნივერსიტეტში ლექციის ჩატარება ხმაურის ფონზე უწევდა, თუმცა ლექციები ხელის შეშლის მცდელობის მიუხედავად მაინც არ ჩაშლილა. ბოლო ინციდენტის დროს, აქტიურად მონაწილეობდა თსუს საერთაშორისო ურთიერთობების ფაკულტეტის მესამე კურსის სტუდენტი ნიკოლოზ მანაგაძე, რომელიც სტუდენტური მოძრაობა „თავისუფლებისთვის“ დამფუძნებელია.
აღსანიშნავია, რომ ნიკო მანაგაძეს რამდენიმე დღის წინ თავს დაესხნენ. აღნიშნულ ფაქტს მისი მშობლები, გაზეთ „ასავალ-დასავალისთვის“ მიცემულ ინტერვიუში აფასებენ და ითხოვენ, პრემიერ ირაკლი კობახიძესთან პირისპირ შეხვედრას, რადგან მათი თქმით ეჭვი აქვთ, გულანთებული ახალგაზრდა სტუდენტის ნიკო მანაგაძის უკან, ოპოზიციის მხრიდან კონკრეტული პირები დგანან.
ნიკო მანაგაძის დედა ვიკა კვიტაშვილი თვლის, რომ მის ოჯახს ახლა შვილი ჰყავს გადასარჩენი.
ვიკა კვიტაშვილი, ნიკო მანაგაძის დედა:
„ვფიქრობ, ჩემი დუმილისა და უმოქმედობის დრო აღარ არის, რადგან შვილი მყავს გადასარჩენი! ოჯახი მის მოსაქცევად ბოლომდე ვიბრძოლებთ, ფარ-ხმალს არ დავყრით და ყოველმხრივ ვეცდებით ბიჭის მობრუნებას. მინდა, იმით დავიწყო, რომ ნიკო მანაგაძე, „ქართული ოცნების“ გულშემატკივარი და გულანთებული მხარდამჭერი იყო. იგი მმართველი პარტიის ახალგაზრდული ორგანიზაციის ერთ-ერთ აქტივისტად ითვლებოდა, მაგრამ ყველაფერი აირია მას შემდეგ, რაც ქუთაისის მესამე საჯარო სკოლაში, რომელიც მთელ ქალაქში ერთ-ერთ პრესტიჟულ და გამორჩეულ სასწავლებლად ითვლება რომელიღაც „ენჯეომ“ შეაღწია და ბავშვების დატრენინგება დაიწყეს. ნიკო სახლში მოდიოდა გაურკვეველი ბუკლეტებით, დროდადრო რადიკალურად იცვლებოდა... დღეს ახლობლებიც მეუბნებიან, რომ იგი აგრესიული ძალების მიერ არის მართული და საფრთხის წინაშე დგას. ამიტომაც ვამბობ, რომ ჩვენი მოდუნების დრო აღარ არის. ახლობლები ნიკოს გონიერებისკენ და სიფრთხილისკენ მოუწოდებენ, მაგრამ ეს ე.წ. ჟურნალისტები, რომლებიც სააკაშვილთან და მის დამნაშავე გუნდთან არიან დაკავშირებული, გამუდმებით წერენ და უკიჟინებენ: „მიდი ნიკო, არ შეშინდე, მაგარი ხარ!“ პირადად გადავაწყდი ეკა კვესიტაძისა და ნანუკა ჟორჟოლიანის გამქეზებლურ კომენტარებს. რამე რომ მოხდეს, მათნაირებისთვის, ვინც ამ ბავშვებს აქეზებს, ჩემი შვილის სიცოცხლე იქნება ჩვეულებრივი მასალა, ოჯახისთვის - ტრაგედია! როგორც ვატყობ, ახალგაზრდების მანიპულირების საქმეში ამოქმედებულია მძლავრი და ავანტიურისტული პროპაგანდის მანქანა, კვესიტაძეების, ჟორჟოლიანების და მათნაირთა ჩართულობით, რათა ახალგაზრდები პერმანენტულად აუმხედრონ ხელისუფლებას მის წინააღმდეგ. გახსენით ეს დანაშაული და გაგვარკვიეთ ვინ დაესხა ჩემ შვილს – პოლიტიკური მოწინააღმდეგეები, თუ ე.წ თანაგუნდელები“.
რაც შეეხება ნიკო მანაგაძის მამას, იმედა მანაგაძის თქმით, მას ეშინია იმ „ბანდის“ რომელიც ნიკოსა და მის თანატოლებს არის ამოფარებული.
იმედა მანაგაძე, ნიკოს მამა:
„სიმართლე გითხრათ, მე ამ ხელისუფლების იმდენად არ მეშინია, რამდენადაც იმ ბანდის, რომელიც ნიკოსა და მის თანატოლებს არის ამოფარებული! ეს ხალხი ყველანაირ სიბინძურეზეა წამსვლელი, გაუკეთებიათ კიდეც, თანაც ბევრჯერ, რათა მერე მთავრობისათვის დაებრალებინათ ყველაფერი. ამჯერად საფრთხე საიდან შეიძლება წამოვიდეს, არ ვიცი და ამიტომაც მივმართავთ ბატონ ირაკლი კობახიძეს, მიგვიღოს და მოგვისმინოს! ეგ ბავშვი უპატრონოდ არ არის ქუჩაში, არ გაგვიმეტებია, მის უკან ობიექტურად მოაზროვნე ოჯახი და გულშემატკივრები დგანან. ყველამ იცის, რომ ნიკო არასოდეს ყოფილა „ნაცი“ და მათი გუნდის წევრი“.
ნიკოს დედა, ვიკა კვიტაშვილი თავდასხმამდე მომხდარ ფაქტს იხსენებს:
„მინდა დავუბრუნდე რამდენიმე დღის წინათ ნიკოს მიერ ტელევიზიით, ერთ-ერთ გადაცემაში გასაჯაროებული ფოტოების ფაქტს! „ტვ პირველის“ ე.წ. ჟურნალისტებმა, რომლებიც ნიკოს ინტერვიუს ჩასაწერად საცხოვრებელი კორპუსის ეზოში ელოდებოდნენ, ბავშვს ტელეფონით შეატყობინეს და შესაბამისი ფოტოებიც გადაუგზავნეს - ვიღაც საეჭვო ტიპები ქვემოთ გელოდებიანო! ნიკომ ეს ინფორმაცია ტელევიზიის პირდაპირ ეთერშივე გაასაჯაროვა... მაქვს საფუძვლიანი ეჭვი, ვიფიქრო, რომ სიტუაციის დრამატიზების მიზნით, ნიკოს პროვოკაციასაც სწორედ ის ხალხი უწყობდა, ვინც მის უკან დგას, ანუ თავისივე თანაგუნდელები...
2023 წლის 8 მარტს, ნიკო დააპატიმრეს და 2-3 დღის შემდეგ გაათავისუფლეს. თავადაც თქვა, რომ კარგად ექცეოდნენ... არც ადმინისტრაციული ჯარიმა გამოუწერიათ. ამის შემდეგ მან ოფისი იქირავა...ჩემდა გასაკვირად, მართლაც იქირავა ვაკეში ოფისი, როგორც თავად თქვა ერთი წლით! კითხვა დამებადა, რა საჭიროებას წარმოადგენდა ეს ყოველივე? ამაზე მან მიპასუხა, რომ სტუდენტური ახალგაზრდული მოძრაობის ჩამოყალიბებას გეგმავდა და სახელწოდებაც მოფიქრებული ჰქონდა — „თავისუფლებისთვის“. ამ ყველაფერმა რასაკვირველია ჩემში პროტესტის გრძნობა გამოიწვია. ოჯახის შეკითხვაზე, თუ ვინ დაუფინანსებდა ოფისს, პასუხის გაცემისგან თავს იკავებდა. აღნიშნა, რომ მოძრაობა იქნებოდა სრულიად გულწრფელი, მებრძოლი, სტუდენტების მიერ შექმნილი, ხოლო ოფისის ხარჯებს ანგარიშის ნომერზე ხალხის მიერ დარიცხული თანხით დაფარავდა.
ერთხელაც, დაჟინებული კითხვის შემდეგ, ნიკომ გვითხრა, რომ კეზერაშვილის ვაჟი მისი მეგობარია და შესაძლოა, ოფისის ხარჯები მამამისს გაეწია. ბუნებრივია, ამან აღგვაშფოთა. ვაფრთხილებდით და ვთხოვდით, რომ უარი ეთქვა კეზერაშვილის მხრიდან ყველანაირ დაფინანსებაზე. თუ მართლაც კეზერაშვილის მიერ ფინანსდება ამ ხნის განმავლობაში მოძრაობის ხარჯები, მაშინ გამოდის, რომ ამ ბავშვებსაც სათავისოდ იყენებენ, რადგან ფულს ტყუილად არავინ იხდის... სრულიად დარწმუნებული ვარ, რომ დავით კეზერაშვილისგან ჩემი შვილი არანაირ დაფინანსებას არ იღებს, რადგან მისი პირადი, ყოველდღიური ხარჯების გაწევა ოჯახს გვიწევს“.
„დიდ პატივს ვცემთ ქვეყნის პრემიერ-მინისტრ ირაკლი კობახიძეს და შეხვედრას ვთხოვთ კონკრეტულ კითხვებთან დაკავშირებით“,- დასძენს ნიკო მანაგაძის ოჯახი.
⭕ აგრეთვე დაგაინტერესებთ:
⭕„მოსალოდნელია მზიანი და ცხელი ამინდი, ტემპერატურა +33, +35 გრადუსამდე მოიმატებს“ - კობა ფარტენაძე
