პარიზში ოქროს ბურთის 68-ე დაჯილდოების ცერემონია გაიმართა. მთავარი პრიზი ესპანელ ფეხბურთელ როდრიგო ერნანდესს, იგივე როდრის გადაეცა, რომელიც წელს ესპანეთის ნაკრების შემადგენლობაში, ევროპის ჩემპიონი გახდა.
ოქროს ბურთის გამარჯვებულების პირველი ხუთეული ასეთია:
- როდრიგო ერნანდესი (მანჩესტერ სიტი)
- ვინისიუს ჟუნიორი (მადრიდის „რეალი“)
- ჯუდ ბელინგემი (მადრიდის „რეალი“)
- დანი კარვახალი (მადრიდის „რეალი“)
- ერლინგ ჰაალანდი (მანჩესტერ სიტი)
- ხოლო ქალებს შორის ოქროს ბურთის მფლობელი ესპანეთის ეროვნული ნაკრების ფეხბურთელ აიტანა ბონმატის ზედიზედ მეორედ გადაეცა.
ფეხბურთის ქართველი გულშემატკივრების განსაკუთრებულ ინტერესს იაშინის ჯილდო იწვევდა, რომელიც წლის საუკეთესო მეკარეს გადაეცემა. 10 ნომინანტს შორის იყო საქართველოს ეროვნული ნაკრებისა და „ვალენსიას“ მეკარე გიორგი მამარდაშვილი, რომელიც საბოლოოდ, მე-7 ადგილზე გავიდა.
იაშინის ჯილდო კი „ასტონ ვილასა“ და არგენტინის ნაკრების გოლკიპერს, ემილიანო მარტინესს ერგო. აღსანიშნავია, რომ მან ეს ჯილდო ზედიზედ მეორედ მოიგო.
რაც შეეხება სხვა ნომინაციებს:
საუკეთესო ახალგაზრდა ფეხბურთელად 17 წლის ასაკში ესპანელი ლამინ იამალი დასახელდა.
საუკეთესო ბომბარდირისთვის განკუთვნილი ჯილდო ჰარი კეინმა და კილიან მბაპემ გადაინაწილეს 2023/24 წლების სეზონში გატანილი 52-52 გოლით.
წლის საუკეთესო მწვრთნელის ჯილდო „რეალის“ თავკაცმა კარლო ანჩელოტიმ მიიღო.
წლის კლუბად მამაკაცთა ფეხბურთში რეალ მადრიდი დასახელდა, ხოლო ქალთა ფეხბურთში „ბარსელონა“.
ხოლო ქველმოქმედებისთვის დაწესებული პრიზი ჯენიფერ ერმოსოს გადაეცა, რომელმაც სახელი გაითქვა ქალთა ფეხბურთის განვითარებისა და სექსუალური შევიწროების წინააღმდეგ ბრძოლაში. ცნობისთვის, ესპანელმა სპორტსმენმა ფეხბურთის ფედერაციის პრეზიდენტის, ლუის რუბიალესის წინააღმდეგ პროკურატურაში საჩივარი შეიტანა მას შემდეგ, რაც ამ უკანასკნელმა მას მსოფლიო ჩემპიონატის ფინალზე, დაჯილდოების ოფიციალური ცერემონიის დროს ტუჩზე აკოცა.
ცნობისთვის, 2024 წლის ოქროს ბურთის დაჯილდოება მადრიდის რეალის მთელი შემადგენლობის პროტესტის ფონზე ჩატარდა. როგორც მედიაში იწერება, რეალის დელეგაციამ პარიზში გამართულ ცერემონიალზე დასწრებაზე სრული შემადგენლობით უარი მას შემდეგ თქვა, რაც გაირკვა, რომ ვინისიუს ჟუნიორი ჟიურის ხმების მიხედვით მეორე ადგილზე გადიოდა.
აგრეთვე დაგაინტერესებთ:
⭕ზოდიაქოს 5 ნიშანი, რომელთათვისაც 2025 წელი ფინანსური თვალსაზრისით ყველაზე წარმატებული იქნება
🎥 რატომ უნდა ვწეროთ ხელით? რა დანიშნულება აქვს დღეს მართლწერას
