საქართველოს ნაკრებმა ერთა ლიგის B დივიზიონის პლეი-ოფის საპასუხო მატჩში „დინამო არენაზე“ სომხეთის ნაკრებს უმასპინძლა, 6:1 დაამარცხა და კვლავ B დივიზიონში ითამაშებს.
გიორგი ჩაკვეტაძე საქართველოს ნაკრების ისტორიაში პირველი ფეხბურთელია, რომელსაც 10 პასი და 10 გოლი აქვს გატანილი.
გიორგი მიქაუტაძემ სომხეთთან მეორე მატჩშიც დუბლი შეასრულა და მის ანგარიშზე უკვე 20 გოლია. იგი ბომბარდირთა დავაში შოთა არველაძეს (26) კიდევ უფრო მიუახლოვდა
ხვიჩა კვარაცხელიამ საქართველოს ნაკრებში მე-18 გოლი გაიტანა და თემურ ქეცბაიას (17) გადაასწრო
შეხვედრა კი საქართველოს ნაკრების სრული უპირატესობით წარიმართა და მისი ბედი, ფაქტობრივად, პირველივე ტაიმში გადაწყდა.
მე-4 წუთი – 1:0. საქართველოს ნაკრებმა სწრაფი კონტრშეტევა განახორციელა, კიტეიშვილის დარტყმული ბურთი მცველს მოხვდა და კარში ჩაიჭრა.
მე-14 წუთი – 2:0. გიორგი ქოჩორაშვილის წამოწყებუილი კომბინაცია გიორგი მიქაუტაძემ დააგვირგვინა.
24-ე წუთი – 3:0. ხვიჩა კვარაცხელია საჯარიმოში სამ ფეხბურთელს გასცდა, ბურთი მიქაუტაძეს გადააწოდა, მან კი ჩაკვეტაძე მონახა და გიორგიმაც ანგარიში სამამდე გაზარდა.
30-ე წუთი – 4:0. კვლავ ხვიჩას აქტიურობის შემდეგ ოთარ კიტეიშვილმა მეოთხე გოლი გაიტანა.
35-ე წუთი – 5:0. ისევე როგორც ერევანში, გიორგი მიქაუტაძემ ამ მატჩშიც დუბლი შეასრულა და მე-20 სანაკრებო გოლი მიითვალა.
48-ე წუთი – 5:1. სომხეთის ნაკრებმა პრესტიჟის გოლი გაიტანა – თავი სევიკიანმა გამოიჩინა.
62-ე წუთზე ხვიჩა კვარაცხელიამ სომხეთის კარში მეექვსე გოლი გაიტანა, ეს საქართველოს ნაკრებში მისი მე-18 გოლია. ამ მაჩვენებლით ხვიჩამ თემურ ქეცბაიას გადაასწრო და „ჯვაროსნების“ საუკეთესო ბომბარდირთა შორის მესამე ადგილზე დაწინაურდა.
საბოლოოდ საქართველოს ნაკრებმა ორი მატჩის ჯამში 9:1 (3:0, 6:1) მოიგო და ერთა ლიგის მომდევნო გათამაშებასაც B დივიზიონში გაატარებს.
⭕ ასევე დაგაინტერესებთ:
⭕„გილოცავ დე“ - გიორგი მიქაუტაძე გოლის გატანის შემდეგ
⭕რატომ ისვრიან პატარძლები თაიგულს? - უცნობი ტრადიციის საიდუმლო
⭕„ერთად ვიმარჯვებთ, ერთად ვსწავლობთ... არაფერი იცვლება, ჩვენ ვაგრძელებთ გზას“ - ალექსანდრე თოფურია
