განათლების, მეცნიერებისა და ახალგაზრდობის მინისტრის კონსულტანტი ზოგადი განათლების საკითხებში გია მურღულია სოციალურ ქსელში სტატუსს აქვეყნებს, რომელსაც „დაიჯესტი“ უცვლელად გთავაზობთ:
„ამ დილას მეთერთმეტე კლასთან გაკვეთილისას ერთმა მოსწავლემ მკითხა:
ამას წინათ ერთ უფროს მეგობარს ვესაუბრებოდი და სიყვარულის სევდა ახსენა. რა არის ეს, როგორ განმარტავდით ამას?
ბევრნაირი პასუხი აქვს ამ კითხვას, მაგრამ რატომღაც აბდ ორ-რახმან ჯამის „ერთი ყაზალი“ გამახსენდა, ვახუშტი კოტეტიშვილმა რომ თარგმნა ქართულად:
„მე ყოველ დილით მივდივარ ბაღში
და თან მიმყვება ამალა დარდის,
კვირტივით ვიგლეჯ თმენის საყელოს,
მოუთმენლობის ცრემლები დამდის.
ვუხმობ და ვიკრებ სათუო ფიქრებს,
რამე ამბავი მაცნობოს იქნებ
მიწიდან ახლად ამოსულ ვარდმა
მიწაში ახლად ჩასული ვარდის“.
სევდა არის სრულყოფილებისა და ბედნიერების ისეთი შეგრძნება, უკვე დასრულებულ უიმედო ამბავს მშვენიერების სინათლედ რომ აქცევს.
როგორი პოეტური კონტრასტია მიწაში ახლად ჩასული ვარდისა (შეყვარებული ქალის) და მიწიდან ახლად ამოსული ვარდის?!
ვინც გიყვარს, მისი მშვენიერება ყოველდღე იბადება შენი გულისა და მზერის წინაშე.
არც არის სადმე ისეთი ადგილი, სიყვარულის არყოფნისთვის რომ იყოს განწირული.
რა უცნაურია, რომ ყველაზე დიდი არსებობით არის ის, რაც თითქოს აღარ არის.
პოეზიას ყველაფრის გამოხატვა შეუძლია - სიტყვის მუსიკას ვერაფერი ეწინააღმდეგება.
არ შეიძლება მკვდარი იყოს ის, ვინც გაცოცხლებს.
იმ მოსწავლემ გაიღიმა და თავი დამიქნია.
მგონი, გაიგო.
თუ ასეა, ეს დილა დაკარგულად ვერ ჩამეთვლება“, - წერს გია მურღულია.
⭕ ასევე დაგაინტერესებთ:
🎥 ჯანმრთელობის რა პრობლემებს გვიქმნის სტრესი და როგორ გავუმკლავდეთ მას? - ზაზა თელიას რჩევები
⭕მერაბ დვალიშვილი საჩემპიონო ქამრის შესანარჩუნებლად შონ ო'მალის 7 ივნისს შეხვდება
