20 იანვარს, ღამის საათებში, საგარეჯოში, ერთ-ერთი კორპუსის აივნიდან შეიარაღებულმა პირმა ცეცხლსასროლი იარაღიდან სროლა დაიწყო. მომხდარი სროლის შედეგად დაიჭრა 5 პირი, რომლებიც „ჯეო ჰოსპიტალის“ კლინიკაში გადაიყვანეს, ასევე გარდაცვლილია 6 ადამიანი.
მომხდარს სოციალურ ქსელში ჟურნალისტი სალომე ბოკუჩავა ეხმაურება, რომელიც შემთხვევის ადგილზე მუშაობს.
„საგარეჯოს ამბავი იმაზე უფრო მძიმეა ვიდრე მთელი დღე გიყვებოდით, ვიდრე მთელი დღე ისმენდით, ვიდრე ვწერთ და ვიდრე ვხედავთ. ვყვებით, ინფორმაციას ერთმანეთს ვუზიარებთ და მაინც ვერ გამოვთქვამთ, ვერ გამოვხატავთ იმ ტრაგედიას, რაც იქ ტრიალებს.
დილით, აივანზე ტანს ზევით შიშველი კაცი გამოვიდა და ტიროდა, ტიროდა და ხმამაღლა ყვიროდა: „რა გააკეთე ნოდარ? რამდენი ოჯახი დაღუპე?” და მართლაც, რა გააკეთა ნოდარმა?!
რამდენი ოჯახი დაღუპა, გაანადგურა, ცხოვრება მოუსპო. რამდენი მშობელი დატოვა შვილის გარეშე, რამდენს ხვალინდელი დღე გაუნადგურა. პოლიციელს ორი შვილი დარჩა ობლად, ერთ ბიჭს სამი.
ნოდარი, გადმოდგა და აივნიდან სროლა დაიწყო, ქაოსურად, უმისამართოდ ისროდა. მეზობელმა მითხრა: „ძაღლებსაც ესროდა“, ძაღლებამდე, დაჭრილების გასაყვანად მისულებსაც ესროდა, სასწრაფოს დაშავებულები ვერ გამოჰყავდა. არ აძლევდა საშუალებას ერთ მეზობელს მეორე გადაერჩინა, პოლიციელის მსგავსაც, ეს პატარა ბიჭებიც ერთმანეთის გადარჩენას შეეწირნენ.
ვინ უფრო გმირია? ზაზა, ზაქრო, გიორგი თუ ნოდო? ან მათი გადარჩენილი მეგობრები. ერთად გაზრდილები არიან და ერთად, ერთმანეთისთვის დახოცილებიც. ერთ ეზოში, ერთ კორპუსში ვიღაც გლოვობს, ტირის, მეორე აივანზე შვილის გადარჩენისთვის ღმერთს მადლობას წირავს. ეს ყველაფერი საშინელი სანახავი, მოსასმენი, გასაგები და გადმოსაცემია. მაგრამ ვერცერთი ჩვენგანი ვერ გაიგებს, რა ტრაგედია ტრიალებს საგარეჯოს ამ პატარა ეზოში.
(ვიზიარებ ოჯახების ტრაგედიას, მოკლული ახალგაზრდები და პოლიციელი, დაჭრილი ბიჭები, ჩემთვის გმირები არიან. ასევე გმირები არიან სასწრაფოს ექიმები, რომლებიც წინააღმდეგობის მიუხედავად თავიანთი მოვალების შესრულებას ცდილობდნენ)“, - წერს სალომე ბოკუჩავა.
აგრეთვე დაგაინტერესებთ:
🔵 საგარეჯოში მოკლული ოთხი ახალგაზრდის ვინაობა ცნობილია
🔵 „მინდა კიდევ ერთხელ მადლობა გადავუხადო ბედს, რომ ჩვენ ერთმანეთს შეგვახვედრა“ - ია ფარულავა
