18 სექტემბერს ცნობილი გახდა, რომ თბილისში, დიდ დიღომში, ავთანდილის ქუჩაზე, საკუთარ ბინაში მოკლული იპოვეს მოდელი კესარია აბრამიძე. არსებული ინფორმაციით, მას სასიკვდილო ჭრილობა ყელის არეში ცივი იარაღით აქვს მიყენებული.
კესარია აბრამიძის მკვლელობაში ბრალდებული პირი დაკავებულია, დანაშაული კი 16-დან 20 წლამდე ან უვადო თავისუფლების აღკვეთას ითვალისწინებს.
აღნიშნულთან დაკავშირებით, სოციალურ ქსელში ჯგუფის „ვეძებ“ დამფუძნებელმა თამუნა მუსერიძემ პოსტი გამოაქვეყნა, სადაც ამბობს, რომ დაღუპული მუდმივად შანტაჟის ობიექტი იყო.
„ერთი წუთით არ დაიჯეროთ, რომ კესო ვინმეს აშანტაჟებდა. პირიქით, აქეთ იყო მუდმივად შანტაჟის ობიექტი. არც ის დაიჯეროთ, თითქოს რამდენჯერმე ჰყავდა ნანახი და სერიოზული ურთიერთობა არ ჰქონიათ.
ბექა მას მუდმივად ავიწროებდა, სახლიდან არ უშვებდა, აკონტროლებდა, უკონტროლებდა ზარებს, ესემესებს. კესო ბოლო ორი წლის განმავლობაში სულ მტკიცების პოზიციაში იყო. ყოველდღიურად უწევდა იმის მტკიცება, რომ ბექა უყვარდა.
შარშან მეგობრებს დაგვირეკა, ვიდეოკოლაჟი გაგვაკეთებინა და მას გაუგზავნა. კესოსაც ისევე უნდოდა ოჯახის შექმნა, როგორც ნებისმიერ ჩვენგანს სურს. კესოსაც ისევე უნდოდა ოჯახური რუტინის შეგრძნება, როგორც თითოეულ ჩვენგანს. კესო არაჩვეულებრივი მეგობარი, მესაიდუმლე, უთბილესი, უკეთილესი, საოცარი იუმორის მქონე გოგო იყო. კესოს მისი მკვლელი ძალიან უყვარდა, ბექასაც უყვარდა, რომ გეკითხა“, - წერს თამუნა მუსერიძე.
აგრეთვე დაგაინტერესებთ:
