ცხოვრებაში უბედური შემთხვევებისგან დაზღვეული არავინ ვართ, ნებისმიერი ჩვენგანი შეიძლება მოულოდნელად სიკვდილის მსხვერპლი გახდეს.
თუმცა, არიან იღბლიანი ადამიანები, რომლებსაც ცხოვრებაში უმართლებთ და შეიძლება ითქვას, რომ ისინი მეორედ იბადებიან.
„დაიჯესტი“ დღეს 5 ქართველ ცნობილ ადამიანზე მოგიყვებათ, რომლებიც ყველაზე იღბლიანი ადამიანები არიან, მათ სიკვდილს თვალებში ჩახედეს და დღეს ცხოვრებას აგრძელებენ.
პეტრე კოლხი
მამა პეტრე კოლხი, რამდენიმე წლის წინ სიკვდილს სასწაულებრივად გადაურჩა.
როგორც თავად ამბობს, ჩაკეტილი სივრცისა და დაშვებული ფარდების შიში დღემდე გამოჰყვა.
„14-15 წლის ასაკიდან გულის სერიოზული პრობლემა მქონდა – წელიწადში ორჯერ მაინც, გულისცემა წუთში 300-მდე ადიოდა. ეს ძალიან ბევრია, ფაქტობრივად, გული სკდებოდა. არაერთხელ გამიჩერდა კიდეც, კომაც მქონდა და ოპერაციაც დამჭირდა. ინფარქტის წინაშე აღმოვჩნდი და ახლაც მაქვს შიში, დიდი ემოციის ფონზე ეს არ განმეორდეს.
ავარიისა და გულის ოპერაციის გარდა, დახრჩობასაც ვარ გადარჩენილი. მეგობრებმა იცოდნენ, რომ ცურვა არ ვიცოდი, ხრიკი მომიწყვეს, ხელი მკრეს და გემიდან გადამაგდეს. ვიძირებოდი, ვგრძნობდი ფსკერისკენ როგორ მივდიოდი, ვიხრჩობოდი. პრაქტიკულად განწირული ვიყავი. მამისტოლა კაცმა გადამარჩინა სიკვდილს. მთელი ცხოვრება გამომყვა ის გრძნობა და ძილშიც კი ხშირად ვიხრჩობოდი. ჩაკეტილი სივრცისა და დაშვებული ფარდების შიში ახლაც მაქვს, სულ მგონია, ვიხრჩობი და ვიგუდები,"- იხსენებს პეტრე კოლხი ერთ-ერთ ინტერვიუში.
2016 წლის 26 მარტს, შორენა ბეგაშვილის ოჯახს წარმოუდგენელი ტრაგედია დაატყდა თავს. ევა საცხოვრებელი სახლის მე-5 სართულიდან გადავარდა, გოგონას ხერხემალი დაუზიანდა, ასევე სხვა მრავლობითი სახის მოტეხილობები აღენიშნებოდა.მაგრამ ეს ის იშვიათი შემთხვევა გახლავთ, როდესაც უბედურებას ბედნიერი დასასრული ჰქონდა.
მას ჯერ საქართველოში, შემდეგ კი თურქეთში რამდენიმე ოპერაცია ჩაუტარდა.
ბედნიერ დასასრულს, წინ შორენას თავდაუზოგავი ზრუნვა, ევას წარმოუდგენელი სიმამაცე და მეგობრებისა და მთელი ქვეყნის გვერდით დგომა უძღოდა. ევამ ათობით უმძიმესი ოპერაცია გადაიტანა და დღემდე გადის რეაბილიტაციას, თუმცა მის სიცოცხლეს საფრთხე აღარ ემუქრება.
ანასტასია თოფურიძე
2010 წელს სიკვდილს სასწაულებრივად გადაურჩა ეკა კახიანის ქალიშვილი - ანასტასია თოფურიძე. მას ბაკურიანში ბურანი დაეჯახა და თავის არეში მძიმე დაზიანებები მიიღო.
ოჯახმა ანასტასია დროულად მოათავსა კლინიკაში და ხანგრძლივი მკურნალობის შემდეგ, მისი სრულფასოვანი გამოჯანმრთელება მოხერხდა.
ნიკა გრიგოლია
იუმორისტი ნიკა გრიგოლია სიკვდილს რამდენჯერმე სასწაულებრივად გადაურჩა.
„რამდენჯერმე სასწაულად გადავურჩი სიკვდილს. მაგალითად, ერთხელ, გზაზე მივდიოდი, მიწა ჩამოიშალა, ხრამში გადავვარდი და პატარა ხის ტოტს დავეკიდე. რომ არა ბედისწერა, 50-მეტრიან ხევში ჩავვარდებოდი, ვერ გადავრჩებოდი და ვერც მიპოვიდნენ.
ერთხელ კი, მანქანა დამეჯახა, მოტოციკლიდან ავვარდი და ჰაერში, 20 მეტრზე ვიფრინე. დიმა ობოლაძე იდგა აივანზე და იმას ჩავუფრინე. მეგობრებისთვის დაურეკავს: აივანზე ვიდექი, ნიკა გრიგოლიამ ჩამიფრინა, გეფიცებით, არაფერს ვეწეოდი, მარტო სიგარეტსო. მოკლედ, მიწაზე დავვარდი, ლავიწის ძვალი გავიტეხე, კანი გადავიტყავე და ჩაფხუტი რომ არ მხურებოდა, იქვე მოვკვდებოდი,“- ამბობს ნიკა გრიგოლია.
ლალი მოროშკინა
საკმაოდ ხიფათიანი ცხოვრება აქვს ჟურნალისტს და პიარ-ტექნოლოგს ლალი მოროშკინას. ის სიკვდილს არაერთხელ გადაურჩა.
რამდენიმე წლის წინ, ლალი მოროშკინა მცხეთის ხიდზე ავარიაში მოხვდა.
„ხიდზე იყო ორმო, რომელმაც ბევრი ადამიანი იმსხვერპლა. მათ შორის ლერი ხაბელოვის ძმა, თემურ შაშიაშვილის მძღოლი და ჩემს მერე კიდევ ორი გოგო. მხოლოდ ამის მერე ჩაატარეს ამ ხიდზე სარემონტო სამუშაოები. წვიმის დროს ეს ორმო ივსებოდა და მძღოლისთვის აბსოლუტურად შეუმჩნეველი რჩებოდა. ჩავარტყი ორმოში, მოვსრიალდი. მოვახერხებდი, გავაჩერებდი მანქანას, მაგრამ წყლის ჭავლი იმდენად ძლიერი იყო, მანქანამ ჩათვალა, რომ ეს იყო ავარია და გახსნა "აირბაგი". ამან გამთიშა, მართვის უნარი დავკარგე და ხიდიდან გადავფრინდი. ვიღაც კაცმა დაინახა ეს ყველაფერი და მაშველები გამოიძახა", - იხსენებს მოროშკინა.
ჟურნალისტი, ავარიის შემდეგ, დიდხანს გადიოდა რეაბილიტაციას და ახლა სრულიად ჯანმრთელია.
⭕აგრეთვე დაგაინტერესებთ:
ვარსკვლავური ომები: ქართველი ცნობილები, რომლებიც ერთმანეთს ვერ იტანენ
„ვაკაჭისაც დავშორდი და ილო ბეროშვილის საყვარლის სტატუსიც მომეხსნა“ - ცოტა რამ ბაბი კირკიტაძეზე
