დღეს, 13 ნოემბერს ქართველი მსახიობი და ტელეწამყვანი აჩიკო სოლოღაშვილი იუბილარია - იგი, 46 წლის გახდა.
აჩიკო სოლოღაშვილი 1979 წლის 13 ნოემბერს თბილისში დაიბადა. მან სამსახიობო განათლება შოთა რუსთაველის სახელობის თეატრისა და კინოს სახელმწიფო უნივერსიტეტში მიიღო.
მისი კარიერა თეატრს, კინოსა და ტელევიზიას უკავშირდება. 2006 წლიდან თბილისის მუსიკისა და დრამის სახელმწიფო თეატრის მსახიობია. ფართო საზოგადოებამ ის განსაკუთრებით გაიცნო ტელეპროექტებით „სხვა შუადღე“, „საქართველოს ვარსკვლავი“ და „ნიჭიერი“. მაყურებლისთვის ასევე კარგად ნაცნობია მისი მონაწილეობა პოპულარულ სერიალში „ჩემი ცოლის დაქალები“.
2013 წელს აჩიკო სოლოღაშვილმა თეატრალური პრემია „დურუჯი“ მიიღო ნომინაციაში „საუკეთესო მსახიობი მამაკაცი“.
მსახიობი დაქორწინებულია ჟურნალისტ ნუცა ქავთარაძეზე. წყვილს ერთი ვაჟი, ალექსანდრე ჰყავს.
წყვილმა ერთმანეთი წლების წინ გაიცნო. როგორც არჩილი მოგვიანებით ინტერვიუში იხსენებდა, ნუცა პირველად თეატრის ეზოში, პრესკონფერენციის დროს დაინახა, სადაც ჟურნალისტებიც იყვნენ დაბარებულები. ნუცა ცნობილი მსახიობისა და რეჟისორის - გოგი ქავთარაძის შვილიშვილია.
„გასტროლზე ვიყავით ხორვატიაში. როდესაც დავბრუნდით, თეატრის ეზოში პრესკონფერენცია იყო, დაიბარეს ტელევიზიები. მაშინ ისე მოხდა, რომ მაგიდასთან შემოქმედებითი ჯგუფი ვიყავით. მოვიდა ინტერვიუების დრო, მანამდე ვხედავდი, რომ ვიღაც მაგარი რუჯით, გრძელით თმით დარბოდა. მიიქცია ჩემი ყურადღება. მაშინ უბრალოდ რესპონდენტი ვიყავი, რომელიც ნუცამ ჩაწერა..."
ამის შემდეგ არჩილმა „რუსთავი 2“-ში დაიწყო მუშაობა, დილის გადაცემაში. ჩათვალეს, რომ გადაცემისთვის კიდევ რამდენიმე ჟურნალისტი იყო საჭირო და დაამატეს კიდეც, მათ შორის იყო ნუცაც.
„ნუცა ბათუმიდან იყო ახალი ჩამოსული, მაშინაც მაგარი დამწვარი იყო და ზედმეტი რუჯისგან სახეზე ლაქა ჰქონდა. თავის მოვლა ჩემი საყვარელი მხარეა. იმ წუთას აღმომაჩნდა სახის ზეთი, რომელიც ამ ლაქის მოსაშორებლად მივეცი ნუცას... შემდეგ დავმეგობრდით და მერე უკვე მოვედით აქამდე, სადაც ახლა ვართ", - ამბობდა სოლოღაშვილი.
არჩილ სოლოღაშვილისა და ნუცა ქავთარაძის ვაჟი, ალექსანდრე 2021 წლის გაზაფხულზე დაიბადა. სანი მშობლებისთვის ნანატრი შვილია - მის დაბადებას ნუცა და აჩიკო 8 წლის მანძილზე ელოდნენ. სახელიც შესაბამისი შეურჩიეს - სანი - პატარა ალექსანდრემ მათი ცხოვრება მართლაც მზით გაანათა.
⭕ აგრეთვე დაგაინტერესებთ:
⭕„ლილიტის მახე“ – რატომ უნდა ვიყოთ განსაკუთრებით ფრთხილად 13 ნოემბერს და რას უნდა მოვერიდოთ?
