ის ზოგიერთს ნათელმხილველად მიაჩნდა, ზოგი XX საუკუნის ნოსტრადამუსს უწოდებდა, ზოგსაც - შარლატანად მიაჩნდა. საუბარია ერიკ იან ჰანუსენის ფსევდონიმით მსოფლიოში ცნობილი იყო გერმან შტაინშნაიდერზე.
გერმან შტაინშნაიდერი ავსტრიაში, ებრაულ ოჯახში დაიბადა. მამა მალე დაქორწინდა ორშვილიან ქვრივზე. ბიჭმა დედის ქორწინება მტკივნეულად აღიქვა და სახლიდან გაიქცა.
შტაინშნაიდერის, როგორც ნათელმხილველის, დებიუტი ვენის ერთ-ერთ კაბარეში 1912 წელს მოეწყო.
ავსტრიული პრესა ახალგაზდა ასტროლოგზე ალაპარაკდა. ცნობით წინასწარმეტყველმა არა მხოლოდ ქალების, არამედ სპეცსამსახურების ყურადღება მიიქცია. მათთვის შტაინშნაიდერი საზოგადოებაში ხელსაყრელი ინფორმაციის გასავრცელებლად იდეალური ფიგურა იყო.
მალე გერმანს შეხვდა ცნობილი გერმანელი მზვერავი, ჰოლკოვნიკი ვალტერ ნიკოლაი. მათი საუბრის შემდეგ გერმანი ბერლინში გადავიდა. ბერლინის კაბარეებში მისმა ოკულტურმა სეანსებმა ნამდვილი ფურორი მოახდინა. ამასთან, შტაინშნაიდერი იმ ინფორმაციას ავრცელებდა, რაც ნიკოლაის სჭირდებოდა.
ბევრი მკვლევარი ეთანხმება ნათელმხილველის კავშირს როგორც ავსტრია-უნგრეთის, ისე გერმანიის სპეცსამსახურებთან, თუმცა არაერთი მათგანი საეჭვოდ მიიჩნევს ცნობას, რომ ის მხოლოდ გერმანიისა და ავსტრიის დაზვერვის ინფორმაციებს ავრცელებდა. ასე მაგალითად, შტაინშნაიდერმა იწინასწარმეტყველა, რომ ავსტრიის ერცჰერცოგ ფერდინანდს სარაევოში მოკლავდნენ, გამოიცნო პირველი მსოფლიო ომის დაწყების წელი (1914) და ისიც, რომ გერმანია ამ ომში დამარცხდებოდა.
- გერმანიას თავს მოახვევენ ზავის დამამცირებელ პირობებს. ტერიტორიებსაც ჩამოაჭრიან. ქვეყანას ქაოსი, გარყვნილება და კორუფცია მოიცავს. განსაზღვრული დროის შემდეგ გამოჩნდება ლიდერი, რომელიც ქვეყანას ააღორძინებს. მე მას უკვე ვხედავ. ამ კაცს ადოლფი ჰქვია, ის ავსტრიელია, მაგრამ გერმანია ყველაფერს ურჩევნია, - ამბობდა გერმანი.
ლიონ ფოიხტვანგერი, რომელმაც შტაინშნაიდერი გამოიყვანა თავის რომანში "ძმები ლაუტენზაკები", წერს, რომ ასტროლოგის წინასწარმეტყველება ბევრმა არასერიოზულად აღიქვა. მის სეანსებზეც, როგორც კარგ საცირკო სანახაობაზე, ისე დადიოდნენ. 1914 წელს სიცილის თავი უკვე ბევრს აღარ ჰქონდა. პირველი მსოფლიო ომი ხომ მართლა დაიწყო. ასტროლოგის სიტყვებსაც უკვე სერიოზულად მიუგდეს ყური.
„ამ კავკასიელის მეშინია“
ასტროლოგის პროგნოზი ახდა და იმპერატორმა ვილჰელმმაც თავისთან დაიბარა. საუბარი ძალიან სწრაფად დასრულდა, რადგანაც ამ უკანასკნელმა იმპერატორს უთხრა:
- თქვენო უდიდებულესობავ, გევედრებით, ომი დაუყოვნებლივ შეაჩეროთ! გერმანიას უცილობელი დამარცხება მოელის, თქვენ კი ტახტს დაკარგავთ!
- გაეთრიე! - დაიღრიალა ვილჰელმ მეორემ.
მისი ბრძანებით ასტროლოგს აღმოსავლეთის ფრონტზე უკრეს თავი. პოლკის მეთაურმა, რომელშიც იგი მსახურობდა, გამოიძახა და ჰკითხა:
- აბა, გვიჩვენე ერთი, რა წინასწარმეტყველი ბრძანდები! მითხარი, მე რა მომელის?
- თქვენი ცოლი რამდენიმე თვეში იმშობიარებს და ვაჟი გეყოლებათ, - მიუგო ასტროლოგმა.
მეთაური უნებლიეთ შეკრთა. ცოლი მართლაც ფეხმძიმედ ჰყავდა. შტაინშნაიდერი თავით ფეხამდე გამომცდელად შეათვალიერა და არაფერი უთქვამს. რამდენიმე თვის შემდეგ კი კვლავ გამოძახა:
- ყოჩაღ, მართლა წინასწარმეტყველი ყოფილხარ! ვაჟი შემეძინა!
ამის შემდეგ ის და ასტროლოგი განუყრელი მეგობრები გახდნენ. მეთაურმა ფულადი პრემია გამოუწერა. მისი ბრძანებით, გერმანს წინა ხაზზე აღარ აგზავნიდნენ. ახალი ასტროლოგი სეანსებს თავისი პოლკის ოფიცრებისთვის მართავდა.
კერძოდ, მან იწინასწარმეტყველა:
- ომი 1918 წელს დამთავრდება. გერმანიას წინ მძიმე დღეები მოელის. ვხედავ ლიდერს, რომელიც გერმანიას აღადგენს. ამ კაცს ადოლფი ჰქვია, ის ავსტრიელია. ეს კაცი გერმანიას ძველ დიდებას დაუბრუნებს. აგერ, ერთი შავგვრემანი კაციც, რომელმაც სული ეშმაკს მიჰყიდა. ის კავკასიელია, მაგრამ რუსეთის იმპერატორი გახდება. ამ კავკასიელისა ძალიან მეშინია. მას გერმანიის განადგურება და მსოფლიო ბატონობა სურს.
ასტროლოგი ამ ყველაფერს 1916 წელს ამბობდა.
აღსასრული
პარადოქსია, მაგრამ ებრაელმა ჰანუსენმა ნაცისტების ხელისუფლებაში მოსვლის საქმეში უდიდესი წვლილი შეიტანა. მისმა მრავალრიცხოვანმა სტატიებმა, სეანსებმა, სადაც ის ჰიტლერს მხსნელად მოიხსენიებდა, პუბლიკაზე განსაცვიფრებელი გავლენა იქონიეს. უილიამ შირერი იმასაც ამტკიცებს, რომ ჰანუსენი ნაცისტების საარჩევნო კამპანიას წარმართავდა. ჰიტლერელებმა გაიმარჯვეს. ფიურერმა სახალხოდ განაცხადა:
- ჰანუსენი გერმანიის სინდისი და ინტელექტია!
მალე ასტროლოგმა ნაცისტურ პარტიაში შესვლის განცხადება დაწერა. ნაციონალ-სოციალისტური პარტიის კრებაზე ჰიტლერი საზეიმოდ აცხადებდა, მალე ჰანუსენი გერმანის მეცნიერებათა აკადემიის პრეზიდენტი გახდებაო. ასტროლოგი ნელ-ნელა გამოიკვეთა ფიგურად, ვისაც ჰიტლერზე უზარმაზარი გავლენა ჰქონდა.
- მას შეეძლო ისეთივე როლი ეთამაშა, როგორიც რასპუტინს - ნიკოლოზ მეორის კარზე, - მიიჩნევს უილიამ შირერი.
ცხადია, ამან ბევრი შეაშფოთა. გებელსმა ჰიტლერს ჰანუსენის ებრაელობა შეახსენა. ფიურერზე ამ ცნობას გავლენა არ მოუხდენია.
- მერე რა, რომ ებრაელია!
ნაცისტური პარტიის ზედაფენა შეშფოთებული იყო. ჰიტლერი უკვე არა მხოლოდ პარტიის ბელადი, სახელმწიფოს მეთაურიც გახლდათ. ჰანუსენისა მას ბრმად სჯეროდა, მისი გავლენაც ფიურერზე განუსაზღვრელი იყო. არც გერინგს, არც გებელსს, არც თავად რემს ამის დაშვება არ შეეძლოთ. ჰანუსენი ყველა მათგანის კონკურენტად გადაიქცა.
1933 წლის 25 მარტს, გამთენიისას, ჰანუსენის ტყვიებით დაცხრილული გვამი ბერლინის გარეუბანში იპოვეს. მკვლელები მალე დააპატიმრეს. ისინი მოიერიშეთა რაზმების წევრები აღმოჩნდნენ. მოგვიანებით, როცა ჰიტლერი ერნსტ რემის მომხრეებს გაუსწორდა, ოფიციალურად ითქვა, რომ ჰანუსენმა რემს ბანქოში დიდძალი თანხა მოუგო და ამ უკანასკნელმაც მისი მკვლელობა შეუკვეთა.
⚪აგრეთვე დაგაინტერესებთ:
რომანოვები არ დაუხოცავთ, ნიკოლოზ II სოხუმის ქუჩებს გვიდა - უცნობი ვერსია
პოეტი, მომღერალი და არაჩვეულებრივი თამადა - ინოლა გურგულიას უცნობი ისტორიები
როგორ შეცვალა მერაბ ნინიძემ გეგა კობახიძე ფილმში „მონანიება“ - აქამდე უცნობი ისტორია
