2021 წლის 25 სექტემბერს დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა, ამირან გამყრელიძემ თანამშრომლებთან ერთად ველისციხეში, ვაქცინაციის ცენტრი მოინახულა და მოსახლეობას შეხვდა , - ამის შესახებ ინფორმაციას „სტუდია მონიტორმა“ გამოაქვეყნა.
ინფორმაციას თან სდევდა ფოტომასალა, რომელშიც ჩანს, თუ როგორ სხედან სუფრასთან დაავადებათა კონტროლის ცენტრის ხელმძღვანელი ამირან გამყრელიძე და მისი თანამშრომლები.
ამავე კადრში ასახულია გამყრელიძე, რომელიც სავარაუდოდ ღვინოს კრამიტით სვამს. აღნიშნული ფოტომასალების გავრცელებას მოქალაქეების არაერთგვარი რეაქცია მოჰყვა. ზოგი შეშოფოთებას რეგულაციების წესის დარღვევის გამო გამოხატავდა, ზოგი კი კონკრეტულად, კრამიტის განსხვავებულ სასმისად გამოყენებამ შეაწუხა.
ფაქტს ბოჭორიშვილის კლინიკის ხელმძღვანელი დავით გადელია გამოეხმაურა და დაწერა:
„მოკლედ რაა...
დიდი ჟივილ-ხივილია ატეხილი ფოტოზე, სადაც ამირან გამყრელიძე სახელდახელო პურმარილზეა და განსხვავებული სასმისით (კრამიტით) სვამს ღვინოს. არის აუარება ვერსია, რატომ აკეთებს ამას მხცოვანი პროფესორი. შევეცადე დამეჯგუფებია ეს ვერსიები და ისე გაწოდებთ:
1. ამირან გამყრელიძე, რომელსაც 30 წელია ძალიან ახლოს ვიცნობ და ამდენი ხანი გაწონასწორებული, მშვიდი, ზომიერზე ნაკლები ჭამა - სმის მოყვარული ადამიანის შთაბეჭდილებას ტოვებდა, სინამდვილეში ყოფილა ანონიმური, ჩუმი ალკოჰოლიკი, ამდენი ღვინო ერთბაშად პირველად ნახა და გაგიჟდა! დაივიწყა რომ ჩაკერებული აქვს და სმა არ შეიძლება - მოკლედ გააფუჭა ამდენი ნაშრომი - შეკავება.
2. ეს ძალიან ჰგავს პირველ ვერსიას, მაგრამ უფრო მეტი რეალობისთვის, ფანტასტიკურია: ფოტო გადაღებულია 30-იან წლებში ვოლგისპირეთში, შიმშილობის დროს და ღვინის გამო კი არა, საჭმელი რომ დაინახა, იმან აცდუნა! არ რცხვენია, ამ შიმშილობის დროს ნაყროვანობს!
3. სპეციალურად აწყობს ასეთ ქეიფებს რეგულაციის დარღვევებით. არაა გამორიცხული, რომ ჯიბიდან ჩუმად ვირუსიანი სინჯარა ამოიღო და სუფრას მოაფრქვია! რომ არ შეწყდეს პანდემია და კოვიდ მაფიამ კვლავ განაგრძოს თავისი ბნელი საქმე!
4. არის მეოთხე ვერსიაც, მაგრამ იმდენად ბანალური, უინტერესო ჩანს, არ იქნება მართალი; სადღაც პერიფერიაზე, მიყრუებულ, მაგრამ დიდ სოფელში, ჩვენი კოლეგები უდიდეს საქმეს აკეთებენ შერეულ მოსახლეობაში. უხილავ, საშინელ მტერთან ბრძოლაში მედგრად უჭირავთ (ბევრ პეროიან რეგიონზე უკეთესადაც!) პოზიციები. სოფლის ამ გადაღლილ, ცალკე ვირუსთან და ცალკე დაუჯერებელ მეზობლებთან ჯაჯგურით ღონეგაცლილ მეციხოვნეებისთვის, ამირან გამყრელიძის სტუმრობა დიდი მოვლენა, სტიმული გახლავთ. ამასთან, როდესაც ამ სუპერთავშეკავებულმა კაცმა მათთან ერთად, ადგილობრივი წესებითაც, გლეხურად, ასე მოილხინა - ეს პოზიტივი კარგა ხანს გაჰყვებათ ენერგიად და მხნეობად, რაც მშვენივრად ესმის გამყრელიძეს...ხო მარა ეს ვერსია რა მოსატანია წინებთან..
ბატონო ამირან, ბატონო პაატა, ვიცი რომ გამუდმებით დადიხართ რეგიონებში, ნახულობთ ხომ ყველაფერი წესრიგშია და თან ამხნევებთ ჩვენს მებრძოლებს ამ ომში. ორივე აცრა ცხადია ჩატარებული მაქვს, ახლა მალე ბუსტერსაც შემოვიღებთ და იმ დოზასაც გავიკეთებ. ჰოდა წამიყვანეთ თან ეს უსაფრთხო კაცი ასეთი კარგი ხალხის გასამხნევებლად! აქედანვე წამოვიღებ რაც საჭიროა, რომ ადგილზე არ შევაწუხო და თან მარჯვენაც დავულოცო! აი ესენი არიან მართლა მოღვაწენი!
აქ ჭირს ხალხს ელემენტარული გააგებინო და წარმომიდგენია სოფლებში რა ძნელია. მადლობის სათქმელად წამოვალ და ვეტყვი - გინდაც ჭიქით, გინდაც კრამიტით ხელში!.... აკაკუნონ მერე აქ ნაცარქექიებმა რამდენიც უნდათ - „ეს რა ქნა, ღვინო რამ დაალევია კრამიტითო!“... - წერს დავით გადელია.
აგრეთვე დაგაინტერესებთ:
🔵„ვისადილეთ ღია სივრცეში შესაბამისი რეგულაციების დაცვით, ყველა გახლავართ აცრილი“ - NCDC-ის პირველი კომენტარი სკანდალურ ფოტოებზე
🔵„ახლაც ცხადად მახსოვს ემოციები ამ დღიდან“ - რას წერს ნანა გეგეჭკორი
🔵„აცრა რომ არ მქონოდა, გამორიცხულია კორონავირუსი გადამეტანა...“ - დათო ტურაშვილი
ცნობისთვის, NCDC-ის თანამშრომლების მიერ „მარან ველისციხურში“ სადილობასთან დაკავშირებით „დაიჯესტს “ დაავადების კონტროლის ეროვნულ ცენტში განუცხადეს, რომ იქ მყოფი ადამიანები აცრილები არიან და ღია სივრცეში მოქმედ რეგულაციებს არ არღვევენ.
„გიდასტურებთ, რომ ნამდვილად ვიყავი, თანამშრომლებთან ერთად, 24-ში წინანდალში, კახეთის მედიასთან და საზოგადოებრივი ჯანმრთელობის ცენტრებთან შეხვედრაზე, ვაქცინაციის გააქტიურების საკითხებზე. 25-ში გახლდით სოფელ ყარაჯალასა და ველისციხეში მოსახლეობასთან შეხვედრებზე და ავცერით ასევე მსურველები. მოვინახულეთ ღვინის ძველი ქართული ტრადიციით დამზადების მუზეუმი-მარანი და ვისადილეთ ღია სივრცეში შესაბამისი რეგულაციების დაცვით. ყველა გახლავართ სრულად აცრილები. მარანმა გადაიღო რამდენიმე სამახსოვრო ფოტო“.
