პოლ ნიუმენი, ჯონ კელი, ჯული ენდრიუსი, გრეგორი პეკი - ეს ჰოლივუდში მოღვაწე ქართველი ქალი მსახიობის, თამარ თუმანოვას კინოპარტნიორების არასრული ჩამონათვლია.
მას წილად ხვდა გენიალურ რეჟისორთან, ალფრედ ჰიჩკოკთან თანამშრომლობაც და მის ფილმში - „დახეული ფარდა“ ერთ-ერთი მთავარი როლის შემსრულებლად მოგვევლინა. მისი დებიუტი სცენაზე კი 9 წლის ასაკში, პარიზში შედგა.
თამარ თუმანოვა 40-იანი წლების ქართველი ვარსკვლავია. მასავით ჰოლივუდში არცერთ ჩვენს თანამემამულეს არ გამართლებია. დღეს ჩვენ სწორედ მის ამბავს გიამბობთ.
მეოცე საუკუნის დასაწყისში ემიგრაციისგან თავის დასაღწევად ახალგაზრდა ცოლ-ქმარი - ფეხმძიმე ევგენია თუმანიშვილი და კონსტანტინე ხაზაროვი მატარებელში ჩასხდნენ და გეზი ჩინეთისკენ აიღეს. გზად მამაკაცს ეპიდემია შეეყარა და გარდაიცვალა. მარტო დარჩენილ ევგენიას ნერვიულობის ნიადაგზე ნაადრევი მშობიარობა დაეწყო. გოგონა, თამარი, ქვეყანას მატარებელში მოევლინა. ქალმა მას თავისი გვარი მისცა.
ევგენიამ მატარებელში გაიცნო კაცი, რომელმაც დაქვრივებული ქალის ქმრობისა და ბავშვის მამობის პასუხისმგებლობა საკუთარ თავზე აიღო. ისინი თავს ჯერ ეგვიპტეში, შემდეგ პარიზში აფარებდნენ.
აქ იწყება გოგონას სწავლა-განათლებაზე ზრუნვა. მას აუყვანეს ფორტეპიანოს, ქორეოგრაფიისა და ბალეტის ცნობილი პედაგოგები. თამარი განსაკუთრებული ენთუზიაზმით ბალეტს ეკიდებოდა და ეს უყურადღებოდ არც მის მასწავლებლებს დარჩენიათ. 9 წლის ასაკში პარიზის სცენაზე დადგმულ ბალეტში "L' Evantail de Jeann“ მონაწილეობდა. სწორედ აქ შეამჩნია ის დიაგილევის საბალეტო დასის ახალდანიშნულმა მთავარმა ქორეოგრაფმა გიორგი ბალანჩივაძემ (ჯორჯ ბალანჩინი) და თამარს თავის დადგმაში მონაწილეობა შესთავაზა. ამ დღიდან იწყება აღმასვლა გოგონას კარიერაში.
1939 წელს, მას ბალანჩინმა ნიუ-იორკში გამგზავრება ურჩია და ოჯახმაც გადაწყვიტა, საცხოვრებლად ამერიკაში გადასულიყო, მანამდე კი გვარის შეცვლა და მამინაცვლის, ვლადიმერ ხასიდოვიჩის გვარის მიღება გახდა საჭირო, რათა საზღვარი უპრობლემოდ გადაეკვეთათ.
აშშ-ში მან რამდენიმე საბალეტო სკოლასთან დაიწყო თანამშრომლობა, თუმცა ბალეტს კინოვარსკვლავობა არჩია და ბედი ჰოლივუდშიც სცადა. მისი დებიუტი ჟაკ ტერნერის ფილმში - „დიდების დღეები“ შედგა, რასაც შემდეგ მოჰყვა: „ანა პავლოვა", „ჩემს გულში“, „შერლოკ ჰოლმსის პირადი ცხოვრება“ და სხვანი. მისი 30-წლიანი ჰოლივუდური ცხოვრება უამრავ როლსა და წარმატებას ითვლის.
განსხვავებით კარიერისგან, წარუმატებლად აფასებენ მის პირად ცხოვრებას. 1944 წელს ამერიკელ პროდიუსერსა და სცენარისტ კეისი რობინსონს გაჰყვა ცოლად, თუმცა ოჯახი 10 წელიწადში დაინგრა. ამის შემდეგ ის აღარ გათხოვილა და არც მემკვიდრე დარჩენია.
გარდაიცვალა 77 წლის ასაკში, 1996 წლის 29 მაისს.
ანდერძის თანახმად, მისი ქონების დიდი ნაწილი მოხმარდა ქველმოქმედებას და გადაეცა ერთ-ერთ საბალეტო სკოლას. დაკრძალულია დედის, ევგენია თუმანიშვილის გვერდით ლოს-ანჯელესის სასაფლაოზე.
აგრეთვე წაიკითხეთ:
ვინ არის თინა ბოკუჩავას მეუღლე და რატომ იტირა ქმრის გამო
ტირანზე შეყვარებული ქალები - ვინ იყო სტალინის უცნობი საყვარელი?
ვერიკო ანჯაფარიძის სასიყვარულო სამკუთხედი და ფარდის მიღმა დარჩენილი ამბები
