Digest Logo

მოულოდნელი ამბები და დაფარული სიმართლე - რას მოგვიტანს 24 ნოემბრის სავსემთვარეობა ტყუპებში?

1795369001
ნინა ხომერიკი

24 ნოემბერი — სუპერ სავსემთვარეობა ტყუპებში! - ამ მნიშვნელოვანი ასტროლოგიური მოვლენის შესახებ სოციალურ ქსელში ასტროლოგი ნინა ხომერიკი წერს და რჩევებს გვიზიარებს. 

„მოულოდნელი სიმართლე, საბედისწერო საუბრები და 9 ნოემბერს დაწყებული პროცესების კულმინაცია…

24 ნოემბერს, თბილისის დროით 18:53 საათზე, ტყუპების 2°20′-ზე დგება სავსემთვარეობა.

ეს არ არის ჩვეულებრივი სავსემთვარეობა, მისი მთავარი თავისებურება ურანთან მჭიდრო შეერთებაა, რაც ასტროლოგიურად მოულოდნელ ცვლილებებს, ინფორმაციის გამჟღავნებას, ურთიერთობებში გარდატეხას და ძველი შეხედულებების ნგრევას უკავშირდება.

რაც აქამდე დაფარული იყო, შესაძლოა გამოაშკარავდეს, რაც გაურკვეველი იყო, პასუხს მოითხოვს, ხოლო ის, რაც დიდი ხანია ცვლილებას საჭიროებს, შესაძლოა მოულოდნელად დაიძრას.

როგორც უკვე ვიცით, 9 ნოემბერს გავიარეთ ახალმთვარეობა მორიელში, ამ ნიშნის ენერგია დაკავშირებულია საიდუმლოებებთან, ღრმა ემოციებთან, ნდობასთან, კონტროლთან, საერთო ფინანსებთან და შინაგან ტრანსფორმაციასთან.

ამ პერიოდში, შეიძლებოდა დაწყებულიყო ისეთი პროცესები, რომლებიც თავდაპირველად უხილავი ან გაურკვეველი იყო.

ეს შეიძლება ყოფილიყო:
• ურთიერთობებში ნდობის საკითხის გამწვავება;
• ძველი პიროვნების ან დაუსრულებელი ისტორიის დაბრუნება;
• ფინანსური ვალდებულებებისა და ვალების გადახედვა;
• დაფარული ინფორმაციის აღმოჩენა;
• მნიშვნელოვანი შინაგანი გადაწყვეტილების მიღება;
• ტოქსიკური დამოკიდებულებებისგან გათავისუფლების სურვილი.

9 ნოემბერს, პროცესები იწყებოდა სიღრმეში, ხოლო 24 ნოემბერს, ისინი შეიძლება გამოჩნდეს სიტყვებში, ფაქტებში, გადაწყვეტილებებსა და რეალურ მოვლენებში.

მორიელის ახალმთვარეობამ დასვა კითხვა:

რისი გვეშინია, რას ვმალავთ და რაზე დავკარგეთ კონტროლი?

ტყუპების სავსემთვარეობა კი სვამს სხვა კითხვას:

რა არის სიმართლე, ვის უნდა ვესაუბროთ და რომელი გადაწყვეტილება უნდა მივიღოთ?

ეს ორი ფაზა ერთი მთვარის ციკლის ნაწილია, თუმცა, მნიშვნელოვანია გვესმოდეს, რომ 24 ნოემბრის სავსემთვარეობა, 9 ნოემბრის ახალმთვარეობის გრადუსობრივ ოპოზიციას არ ქმნის, კავშირი მთვარის ციკლის განვითარების ლოგიკაშია. 24 ნოემბრის სავსემთვარეობის ერთ-ერთი ყველაზე მნიშვნელოვანი ასპექტია მთვარის შეერთება რეტროგრადულ ურანთან ტყუპებში.

ურანი თავისუფლების, მოულოდნელი ცვლილებების, სიახლეების, ტექნოლოგიებისა და ძველი სისტემების რღვევის სიმბოლოა, ტყუპები კი მართავს ინფორმაციას, კომუნიკაციას, აზროვნებას, დოკუმენტებს, მოლაპარაკებებსა და ყოველდღიურ გადაადგილებას.

ამიტომ, შესაძლოა განსაკუთრებით აქტუალური გახდეს:

• მოულოდნელი შეტყობინებები და სატელეფონო საუბრები;
• ინფორმაციის გაჟონვა ან ადრე უცნობი ფაქტების აღმოჩენა;
• ურთიერთობებში მოულოდნელი გადაწყვეტილებები;
• გეგმების სწრაფი ცვლილება;
• სამსახურთან, სწავლასთან ან ხელშეკრულებებთან დაკავშირებული სიახლეები;
• ტექნოლოგიური შეფერხებები ან მოულოდნელი შესაძლებლობები.

ურანის რეტროგრადულობა მიგვანიშნებს, რომ ბევრი საკითხი შესაძლოა წარსულიდან დაბრუნდეს და მიღებული ახალი ინფორმაცია სინამდვილეში, ძველი ისტორიის გაგრძელება აღმოჩნდეს.

ამ სავსემთვარეობის მთავარი გაკვეთილია: თავისუფლება არ ნიშნავს ყველაფრის ერთ წამში დანგრევას, ზოგჯერ თავისუფლება სიმართლის დანახვით იწყება.

ამ დღეს, მზე მშვილდოსანშია, მთვარე და ურანი კი ტყუპებში, რაც მათ შორის წარმოშობს ოპოზიციას, ანუ ძველსა და ახალს შორის დაპირისპირებას. მშვილდოსანი წარმოადგენს რწმენას, მსოფლმხედველობას, პრინციპებსა და დიდ მიზნებს. ტყუპები — ინფორმაციას, ფაქტებს, კითხვებსა და მრავალფეროვან შესაძლებლობებს. ამ დაპირისპირებამ, შეიძლება გაამწვავოს კონფლიქტი იმას შორის, რისიც გვჯეროდა და იმას შორის, რასაც რეალური ფაქტები გვაჩვენებს. განსაკუთრებით მნიშვნელოვანია, არ ავურიოთ ერთმანეთში ვარაუდი და დადასტურებული ინფორმაცია. შესაძლოა ზოგი ადამიანი მიხვდეს, რომ დიდი ხნის განმავლობაში, არასწორ ინფორმაციას ეყრდნობოდა ან ურთიერთობაში მხოლოდ მისთვის სასურველ სიმართლეს ხედავდა.

ასევე საყურადღებოა ის ფაქტორიც, რომ სავსემთვარეობის დროს, მარსი ლომის დაახლოებით 29°-ე გრ-ზე იდგება, რომელიც ასტროლოგიურად განსაკუთრებით გამოკვეთილ თვითგამოხატვას, სიამაყეს, საკუთარი პოზიციის დაცვის სურვილს და ემოციური იმპულსურობას უკავშირდება.

ამ ფონზე შესაძლოა გაიზარდოს:

• გაღიზიანება და მოუთმენლობა;
• საკუთარი სიმართლის დამტკიცების სურვილი;
• კონფლიქტი ავტორიტეტებთან;
• იმპულსური გადაწყვეტილებები;
• ზედმეტად მძაფრი რეაქცია კრიტიკაზე.

მთავარი გაფრთხილებაა: ნუ მიიღებთ საბოლოო გადაწყვეტილებას მხოლოდ იმიტომ, რომ კონკრეტულ მომენტში გაბრაზებული ან შეურაცხყოფილი ხართ.

პირადი ურთიერთობები.

9 ნოემბრის ახალმთვარეობამ მორიელში ნდობის, ერთგულების, ეჭვიანობისა და ემოციური დამოკიდებულების თემები გაააქტიურა, ხოლო 24 ნოემბერის სავსემთვარეობა, შექმნის ამ საკითხებზე საუბრის განსაკუთრებულ საჭიროებას. ზოგი წყვილისთვის ეს იქნება გულწრფელი დიალოგის შესაძლებლობა, ზოგისთვის კი, იმის გაცნობიერება, რომ ძველი ფორმით ურთიერთობის გაგრძელება აღარ სურს. აგრეთვე, შესაძლებელია მოულოდნელი კონტაქტი წარსულიდან, თუმცა, ნებისმიერი დაბრუნება შერიგებას არ ნიშნავს.

ურთიერთობის მომავალი უნდა შეფასდეს არა დაპირებებით, არამედ რეალური ქცევით და მთავარი კითხვა, რომელიც საკუთარ თავს უნდა დავუსვათ: გვაკავშირებს ერთმანეთთან სიყვარული, თუ მხოლოდ ჩვევა და დაკარგვის შიში არსებობს?..

ფინანსები, ბიზნესი და კარიერა

9 ნოემბრის მორიელის ახალმთვარეობა, სიმბოლურად საერთო ფინანსებთან, ვალებთან, გადასახადებთან და ფინანსურ დამოკიდებულებებთან იყო დაკავშირებული. 24 ნოემბრის სავსემთვარეობამ შესაძლოა გამოაჩინოს ამ საკითხების საინფორმაციო მხარე: საბუთები, შეთანხმებები, ანგარიშები, მიმოწერა ან მოლაპარაკებები. ეს პერიოდი, კარგია ფინანსური ინფორმაციის გადამოწმებისთვის, ძველი ვალდებულებების გაანალიზებისა და საქმიანობაში ახალი მიდგომების მოსაძიებლად, თუმცა ურანის მონაწილეობა გვახსენებს, რომ სწრაფი ცვლილება ყოველთვის სასარგებლო არ არის. მოერიდეთ დაუზუსტებელ ინფორმაციაზე დაფუძნებულ ინვესტიციებს, ნაჩქარევ ხელშეკრულებებსა და ემოციური გადაწყვეტილებით დიდი ფინანსური რისკის აღებას.

ამ პერიოდის დადებითი შესაძლებლობები: ვენერა, პლუტონი და ნეპტუნი

ამ პერიოდის ასტროლოგიურ სურათში, მხოლოდ დაძაბულობა არ არის. ვენერა სასწორში ურთიერთობებში დიპლომატიისა და სამართლიანი შეთანხმების შესაძლებლობას უსვამს ხაზს. პლუტონი მერწყულში, ნეპტუნი ვერძში და ურანი ტყუპებში ქმნიან ჰარმონიული ასპექტების ფონს, რომელიც სიმბოლურად ახალ აზროვნებას, შემოქმედებით მიდგომებსა და ძველი ჩარჩოებისგან გათავისუფლებას უწყობს ხელს, ამიტომ, ცვლილება შეიძლება იყოს არა მხოლოდ კრიზისი, არამედ მნიშვნელოვანი წინსვლის დასაწყისიც.

ვის შეეხება განსაკუთრებით ძლიერად ეს სავსემთვარეობა

სავსემთვარეობის გავლენა, ასტროლოგიურად განსაკუთრებით გამოიკვეთება მათთვის, ვისაც მზე, მთვარე, ასცენდენტი ან პირადი პლანეტები აქვთ ტყუპების, მშვილდოსნის, ქალწულისა და თევზების პირველ გრადუსებში, განსაკუთრებით 0-დან – 5 გრადუსამდეა საყურადღებო, ვინაიდან მათ ცხოვრებაში, ცვლილებები შეიძლება ეხებოდეს პირად ურთიერთობებს, ცხოვრების მიმართულებას, საქმიანობას ან მნიშვნელოვან გადაწყვეტილებებს. ასევე აქტუალური იქნება 9 ნოემბერს დაწყებული საკითხების გადახედვა იმ ადამიანებისათვის, ვისაც ჰყავს პირადი პლანეტები მორიელის 14 დან – 20-ე გრადუსის ჩათვლით.

რა უნდა გავაკეთოთ 24 ნოემბერს: 

გადაამოწმეთ ინფორმაცია, სანამ გადაწყვეტილებას მიიღებთ;

მოუსმინეთ იმასაც, რაც თქვენს შეხედულებებს ეწინააღმდეგება;

დაასრულეთ საუბრები, რომლებიც დიდი ხანია გადადებული გაქვთ;

გათავისუფლდით მოძველებული აზროვნებისა და არაჯანსაღი დამოკიდებულებებისგან;

მნიშვნელოვანი ფინანსური და იურიდიული საკითხები მხოლოდ ფაქტებზე დაყრდნობით გადაწყვიტეთ;

შეეცადეთ ცვლილებებს შიშის ნაცვლად გააზრებული მოქმედებით შეხვდეთ.

რას უნდა მოერიდოთ:

• იმპულსურ დაშორებებს;
• სიტყვიერ დაპირისპირებებს;
• დაუზუსტებელი ინფორმაციის გავრცელებას;
• ემოციურ ულტიმატუმებს;
• ნაჩქარევ ფინანსურ გადაწყვეტილებებს.

ამ პერიოდის მთავარი გზავნილია:

9 ნოემბერს, მორიელის ახალმთვარეობამ, გვაიძულა საკუთარ სიღრმეებში ჩაგვეხედა. 24 ნოემბერს, ტყუპების სავსემთვარეობა კი გვთხოვს, დანახული სიმართლე გავიაზროთ და სათანადო სიტყვები და გადაწყვეტილებები მოვძებნოთ.

თუ 9 ნოემბერი იყო შინაგანი გარდაქმნის დასაწყისი, 24 ნოემბერი შეიძლება გახდეს ამ ცვლილების გაცნობიერებისა და გამოხატვის მნიშვნელოვანი ეტაპი. ზოგჯერ ცხოვრება მოულოდნელად იმიტომ იცვლება, რომ ძველი წარმოდგენებით გაგრძელება უკვე შეუძლებელია.
ამ სავსემთვარეობის მთავარი ფორმულაა:

9 ნოემბერი — გავაცნობიეროთ, რა არის დამალული.

24 ნოემბერი — დავინახოთ ფაქტები და გავაკეთოთ გააზრებული არჩევანი.

სიმართლე ყოველთვის კომფორტული არ არის, მაგრამ ხშირად სწორედ ის გვაძლევს თავისუფლებას

სავსემთვარეობის მთავარი გზავნილია: ძველი ინფორმაციის გადაფასება, მოულოდნელი სიმართლის აღმოჩენა და ცვლილებების მიღება.

 

⭕ აგრეთვე დაგაინტერესებთ:

⭕„ფიზიკურად ვერ გპასუხობთ, მადლობა თითოეულ თქვენგანს ამხელა სიყვარულისთვის“ - მარიამ შარმანაშვილი

⭕რატომ გვთავაზობენ ყავასთან ერთად წყალს? - ამ ტრადიციას თავისი მიზეზი აქვს, რას წერს არუნ ხათრი

⭕„ბრძოლის საწყის წუთებში ჩემმა ძმამ მარცხენა მხარი ამოიგდო, რამაც ბრძოლის მიმდინარეობა სრულად შეცვალა...“ - ილია თოფურია ძმის ბრძოლაზე

✕