Black Sabbath-ის ათასობით გულშემატკივარი ბირმინგემში შეიკრიბა, რათა „ბნელეთის პრინცს“ შესაფერისი ფორმით დაემშვიდობონ.
ისინი შვედეთიდან, გერმანიიდან და აღმოსავლეთის ყველა წერტილიდან ჩავიდნენ, თუმცა უმეტესი მათგანი ოზი ოსბორნის მშობლიური მხარიდან, ბირმინგემიდან არიან.
ბროდ-სტრიტზე მდებარე Black Sabbath-ის ხიდი, რომელიც 2019 წელს Black Sabbath-ის გიტარისტმა, ტონი აიომიმ და ბასისტმა, გიზერ ბატლერმა გახსნეს, ამჟამად სალოცავადაა გადაკეთებული. ხალხი გამთენიას შეიკრიბა და ოზის კატაფალკით მსვლელობას ელოდა.
ყვავილების ტალღა ტროტუარებზე მიედინებოდა, ცაში ბუშტები ფრიალებდნენ, ხმაურში კი Black Sabbath-ის სიმღერები ისმოდა.
წვერები, ცხენის კუდები, ტატუები, სხვადასხვა ფერის თმა, შავი ჯინსები და შავი მაისურები ოზის გამოსახულებით, ერთ-ერთზე კი უბრალოდ წარწერა „Black Sabbath-ის დასასრული“.
შეიძლება ითქვას, რომ შავი ფერის დომინანტობა დაკრძალვის სტილს ჰგავდა, მაგრამ ეს უბრალოდ ყოველდღიური სამოსია, რომელსაც როკერები ატარებენ.
ოზის არავინ ჰგავდა ისე, როგორც კაცი, რომელიც გრძელ შავ პალტოში იყო გამოწყობილი, ლურჯად შეფერილი სათვალით, კისერზე ჯაჭვი, ჯაჭვზე კი ჯვარი ჰქონდა შემოხვეული და შავი თმის ფარდის მიღმა იყურებოდა.
„ოზის მეძახიან“, - თქვა მან, მაგრამ მისი ნამდვილი სახელი პიტერ სტირზაკერია.
მსვლელობამდე ერთი საათით ადრე, Black Sabbath-ის ხიდთან შეკრებილი ხალხი 20-ჯერ გაიზარდა, ბროდ-სტრიტზე კი შეძახილი „ოზი, ოზი, ოზი!“ ისმოდა.
ამასთან, შორიდან ისმოდა ორკესტრის ხმა, რომელიც მსვლელობას მიუძღოდა და Sabbath-ის სიმღერებსა და ოზის სოლო ალბომს უკრავდა.
„როდესაც 1969 წელს „როლინგ სტოუნზის“ წევრი ბრაიან ჯონსი გარდაიცვალა და სტოუნზმა ჰაიდ პარკში უფასო კონცერტი გამართა, მათ პატივისცემის ნიშნად ყუთებიდან პეპლები გაუშვეს. ერთი წამით გამიელვა აზრმა, რომ ახლა ღამურები უნდა გაეშვათ“,- თქვა ერთ-ერთმა გულშემატკივარმა.
ოსბორნის დაკრძალვის პროცესია საკმაოდ დიდხანს გაგრძელდა.
ფოტოებიდანაც, ჩანს რომ „ბნელეთის პრინცის“ გასაცილებლად ათი ათასობით ადამიანი შეიკრიბა, სწორედ ამიტომ საზოგადოებამ პრინცესა დიანას დაკრძალვას შეადარა:
„ოზი ოსბორნის დაკრძალვის პროცესიამ პრინცესა დაიანას დაკრძალვის პროცესია გაგვახსენა, თუმცა ეს უფრო მძიმე იყო და თან მეტალის თანხლებით“, - წერს ბრიტანელი ჟურნალისტი მიკ ბრაუნი.
გასულ სამშაბათს მთელი მსოფლიო ლეგენდარული როკმუსიკოსის ოზი ოსბორნის გარდაცვალებამ დაამწუხრა.
„ბნელეთის პრინცი“, როგორც მას უწოდებდნენ, 76 წლის ასაკში საკუთარ სახლში, ოჯახის გარემოცვაში გარდაიცვალა. იგი მძიმე სენს რამდენიმე წლის განმავლობაში ებრძოდა.
ოზი ოსბორნი გახდა ერთ-ერთი იმ იშვიათი ვოკალისტთაგანი, რომელმაც არამარტო ხმა, არამედ მთელი ეპოქა შექმნა. მისი გავლენა იგრძნობა დღემდე თითქმის ყველა მეტალ და „ჰარდ როკ“ ჯგუფში.
სტატიის ავტორი: ნინი ჭიჭინაძე
⭕ ასევე დაგაინტერესებთ:
⭕კეტი პერიმ და კანადის ყოფილმა პრემიერ-მინისტრმა ერთად ივახშმეს - პაემანი თუ „პაემანი“
⭕ „რა ლამაზია...“ - შორენა ბეგაშვილის ამერიკული ვოიაჟი გრძელდება
