სანამ მსოფლიო ხელოვნური ინტელექტის (AI) ციფრულ შესაძლებლობებზე მსჯელობს, ტექნოლოგიური გიგანტები რობოტებს ფიზიკურ სამყაროში გადაადგილებასა და ადამიანის მსგავსი მოძრაობების შესრულებას ასწავლიან. ამ პროცესში კი უმნიშვნელოვანესი როლი ინდოეთის მოსახლეობამ იკისრა, ისინი საოჯახო საქმეებს ვიდეოზე იწერენ და ამაში სტაბილურ ანაზღაურებას იღებენ.
საერთაშორისო მედიასაშუალებების, AFP-ისა და France 24-ის ინფორმაციით, ინდოეთში სულ უფრო მეტი ადამიანი საქმდება საყოფაცხოვრებო მოქმედებების ვიდეოფიქსაციით.
პროექტისთვის მოწყობილია სპეციალური სივრცეები, რომლებიც ჩვეულებრივ ბინებს ჰგავს. ადამიანები იქ მიდიან და ასრულებენ სტანდარტულ საქმეებს, ჭურჭლის რეცხვას, ნივთების გადაადგილებას თუ დალაგებას.
თითოეული ჩანაწერი ზუსტად 4 წუთს გრძელდება. ზოგიერთი განსაკუთრებით აქტიური მონაწილე დღეში 90-მდე ასეთ ვიდეოს აკეთებს.
დასაქმებულები საათში საშუალოდ 3 დოლარზე მეტს გამოიმუშავებენ, რაც ადგილობრივი ეკონომიკური სტანდარტებით საკმაოდ სოლიდური თანხაა.
მონაწილეები ჩანაწერებს Objectways-ის აპლიკაციით გზავნიან, ეს კომპანია Fortune 500-ის (მსოფლიოს უმსხვილესი კომპანიების) კლიენტებს ემსახურება და მათ რობოტების ალგორითმების დასახვეწად ბუნებრივ „ადამიანურ მონაცემებს“ აწვდის. ქვეკონტრაქტორი კომპანია Qanat-ის ბაზაში უკვე 2 000-ზე მეტი აქტიური პირია დარეგისტრირებული.
„გარკვეული სამუშაო ადგილები სხვებს უნდა გადაეცეს“, - აცხადებს Objectways-ის ხელმძღვანელი რავი შანკარი.
საყოფაცხოვრებო ვიდეოების ასეთი მასობრივი შესყიდვა პირდაპირ კავშირშია უახლეს გლობალურ გათვლებთან. გავლენიანი საინვესტიციო ბანკის, Morgan Stanley-ის ანალიტიკოსების პროგნოზით, 2050 წლისთვის დედამიწაზე ჰუმანოიდური (ადამიანის მსგავსი) რობოტების რაოდენობა 1 მილიარდს გადააჭარბებს.
ტექნოლოგიური გიგანტები მიიჩნევენ, რომ მომავალში რობოტი გახდება ისეთივე ხელმისაწვდომი და აუცილებელი პროდუქტი ყოველი ოჯახისთვის, როგორიც დღეს სმარტფონი ან ავტომობილია.
ინდოეთში შეგროვებული მილიონობით ვიდეომასალა სწორედ იმისთვისაა საჭირო, რომ მომავლის რობოტებმა სახლში მოძრაობისას ნივთები არ დაამტვრიონ, ზუსტად გათვალონ ხელის მოჭერილობის ძალა ფიალის აღებისას და ადამიანისთვის ბუნებრივი, უსაფრთხო ტრაექტორიით იმოძრაონ.
აგრეთვე დაგაინტერესებთ:
