ზუგდიდის საქალაქო სასამართლოში „საქართველოს ბანკზე“ თავდასხმის ბრალდებით დაკავებული ბადრი ესებუას სასამართლო პროცესი დასრულდა.
ბრალდებული ესებუა პროცესს ონლაინ რეჟიმში ესწრებოდა. მოსამართლის კითხვაზე ესებუამ თქვა, რომ არ სურს პროცესს სკაიპით ესწრებოდეს.
„ნორმალურად არაფერი მესმის. სურვილი მაქვს პროცესს თავად ვესწრებოდე“, - აცხადებს ესებუა.
ცნობისთვის, შეიარაღებული, ნიღბიანი პირი ზუგდიდში, „საქართველოს ბანკის“ ერთ-ერთ ფილიალში 2020 წლის 21 ოქტომბერს შეიჭრა და მძევლად აიყვანა 43 ადამიანი. მოგვიანებით ცნობილი გახდა, რომ თავდამსხმელი ბადრი ესებუაა და 500 ათას დოლარს და უსაფრთხოდ გადაადგილებას მოითხოვს.
სამართალდამცველთან მოლაპარაკების შედეგად, მოთხოვნებზე თანხმობის მიღების შემდეგ, ესებუამ მძევლების უმრავლესობა გაათავისუფლა და სამ მძევალსა და სამეგრელო-ზემო სვანეთის პოლიციის დეპარტამენტის დირექტორთან ერთად დატოვა ბანკის შენობა. ვრცელდებოდა ცნობები, რომ ის, სავარაუდოდ, ოკუპირებულ აფხაზეთში გადავიდა.
ბადრი ესებუა სამართალდამცველებმა 8 თებერვალს გამთენიისას დააკავეს. მას 15 წლამდე პატიმრობა ემუქრება.
აგრეთვე დაგაინტერესებთ:
