ცნობილი მოდელი თამთა შედანია სოციალურ ქსელში გულახდილ და ღრმა ემოციებით სავსე პოსტს აქვეყნებს, სადაც მრავალშვილიანი დედობის გამოწვევებზე, შვილების აღზრდის პასუხისმგებლობაზე და იმ რთულ გზაზე საუბრობს, რომელიც საკუთარ თავში უამრავ უძილო ღამეს, შიშსა და ბრძოლას ატარებს.
მოდელის თქმით, თითოეული კადრი მისი შინაგანი სიძლიერისა და რეალური ისტორიის ანარეკლია, რადგან ყველა ღიმილისა და ვიზუალური სილამაზის მიღმა ბევრად რთული რეალობა დგას:
„ჩემთვის ეს ფოტოები უბრალოდ ლამაზი კადრები არ არის… თითოეული მათგანი ჩემი ხასიათის, ჩემი შინაგანი ბრძოლისა და იმ გზის ანარეკლია, რომელსაც დღეს გავდივარ.
ვიტყოდი, რომ ასეთი რთული, ეკლიანი და წინააღმდეგობებით სავსე გზა ცხოვრების არცერთ ეტაპზე არ გამივლია. დღეს ოთხი შვილის დედა ვარ 17, 11, 4 და 1 წლის ანგელოზების, რომელთა აღზრდაც უდიდეს პასუხისმგებლობას, ენერგიას, მოთმინებას და უსაზღვრო სიყვარულს მოითხოვს.
ჩემთვის დედობა მხოლოდ შვილების გაზრდა არ არის. ეს არის ყოველდღიური შრომა, თითოეულ მათგანში საკუთარი ენერგიის, ღირებულებების და სიყვარულის ჩადება, რათა ჩამოყალიბდნენ ღირსეულ, კეთილ, თავმდაბალ და ძლიერ პიროვნებებად. მინდა, მათ მხოლოდ ცხოვრება კი არ ვასწავლო, არამედ ადამიანობა.
მიხეილის დაბადება უფლის წყალობით და მფარველობით მოხდა. ეს საოცარი ბიჭი სამყაროს რთული გზით მოევლინა. მშობიარობის დროს ჩემი და მისი სიცოცხლე საფრთხის ქვეშ აღმოჩნდა. ალბათ, ერთ დღეს ამ ისტორიასაც მოვყვები… სწორედ ამიტომ მაკავშირებს მასთან განსაკუთრებული, სიტყვებით აუხსნელი კავშირი.
ის ჩემთვის სიცოცხლის განსაკუთრებული ენერგიაა ძალა, რომელიც ყოველდღიურად მაძლევს ბრძოლის, წინსვლის და კიდევ ერთხელ წამოდგომის მოტივაციას. განსაკუთრებით მაშინ, როცა ყველაზე მეტად მიჭირს.
ამ ყველაფრის პარალელურად კი უნდა შევძლო, ვიყო ძლიერი ქალი, წარმატებული პროფესიონალი, შემდგარი პიროვნება და რაც მთავარია, დედა, რომელიც საკუთარ შვილებს არასოდეს აგრძნობინებს, რომ ცხოვრების სირთულეებს უმკლავდება.
ალბათ, სწორედ ეს არის ის, რისი დანახვაც მინდა ამ ფოტოებში არა მხოლოდ გარეგნული სილამაზე, არამედ ქალი, რომელიც უამრავ რამეს ატარებს საკუთარ თავში, მაგრამ მაინც აგრძელებს ცხოვრებას, მუშაობას, ოცნებას და ბრძოლას.
მინდა, ერთი რამ ვთქვა: სოციალური ქსელების მიღმა გაცილებით მეტი რეალობაა, ვიდრე ეს ლამაზად შერჩეულ ფოტოებსა და ვიდეოებში ჩანს. ყველა ღიმილის უკან შეიძლება დიდი ისტორია იმალებოდეს, ყველა ლამაზი კადრის მიღმა უძილო ღამეები, ცრემლები, შიში, პასუხისმგებლობა და ბრძოლა, რომელზედაც არავინ არაფერი იცის.
ცხოვრება ყოველთვის ისეთი ფერადი არ არის, როგორიც ჩვენს ეკრანებზე ჩანს.
და მაინც, მე ვირჩევ, ვიყო ძლიერი. არა იმიტომ, რომ არასდროს მტკივა ან არასდროს ვიღლები, არამედ იმიტომ, რომ ბევრი რამ მაქვს, რისთვისაც ღირს ცხოვრება.
ეს ფოტოები ჩემი სიძლიერის შეხსენებაა. ჩემი რეალობაა. ჩემი ისტორიაა“, - წერს თამთა შედანია.
ცნობისთვის, შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, 2025 წლის 11 ნოემბერს, ნარკოდანაშაულის ბრალდებით, წარსულში ნასამართლევი, 1985 წელს დაბადებული, რატი რატიანი დააკავეს, რომელიც თამთა შედანიას მეუღლეა.
მას ბრალი ედება განსაკუთრებით დიდი ოდენობით ნარკოტიკული საშუალების უკანონო შეძენა - შენახვაში, ასევე, უკანონო რეალიზაციის ხელშეწყობაში და განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანაში.
დანაშაულები 20 წლამდე ან უვადო თავისუფლების აღკვეთას ითვალისწინებს.
გამოძიებით დადგინდა, რომ სამართალდამცველების მიერ ნარკოდანაშაულის ბრალდებით დაკავებულს, საცხოვრებელი სახლის ტერიტორიაზე მდებარე მიწის ნაკვეთში, ფარულად, მიწის სიღრმეში მოწყობილი ჰქონდა სპეციალური სათბური, სადაც განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა-მოყვანას ახდენდა.
აღნიშნული ტერიტორიის ჩხრეკისას პოლიციამ განსაკუთრებით დიდი ოდენობით - 283 ძირი მცენარე „კანაფი“ და 3 კილოგრამამდე გამომშრალი „მარიხუანა“ ნივთმტკიცებად ამოიღო.
View this post on Instagram
⭕ ასევე დაგაინტერესებთ:
⭕ ვინ არის ნამდვილი მონსტრი და სად გადის ზღვარი გმირსა და ბოროტმოქმედს შორის: რას წერს ნინი დგებუაძე
