ტელეკომპანია „მთავარ არხზე“ დახურვის შემდეგ ვანო ჯავახიშვილის შოუ „ტვ პირველზე“ გავა - ამის შესახებ ინფორმაცია იუმორისტმა ვანო ჯავახიშვილმა თავად გაავრცელა. მისი თქმით, გადაცემა იგივე დროს, პარასკეობით, 22:00 საათზე დაიწყება.
აღნიშნულ ფაქტს სოციალურ ქსელში დიდი გამოხმაურება მოჰყვა. საზოგადოების დიდმა ნაწილმა გუნდს მიღებული გადაწყვეტილება დაუწუნა და უარყოფითი შეფასებებიც არ დაიშურა.
ვანო ჯავახიშვილის შოუს „ტვ პირველზე“ გადასვლის საკითხს სოციალურ ქსელში ჟურნალისტი ინგა გრიგოლიაც გამოეხმაურა და უარყოფითი კომენტარების ავტორები გააკრიტიკა.
„ყველაზე მეტად უსამართლობას ვერ ვიტან და რომ არ დავწერო, შანსი არაა, რა! დღეს კიდევ ერთხელ დავრწმუნდი, რა დაუნდობელი ხალხი ვართ! ეს რა კომენტარები ვნახე დაწერილი „ვანოს შოუზე“.
ადამიანი, რომელიც ყველაზე ღირებულ და ფასაუდებელ პროექტს აკეთებდა ქართულ ტელესივრცეში, წლების განმავლობაში, რომელსაც ტოლი და სწორი არ ჰყავდა სატელევიზიო ბაზარზე, შექმნილი გარემოების გამო, გადმოვიდა სხვა არხზე და რა კომენტარები უწერეს…
ფულის გამო რომ ნდომებოდა სამსახურის შეცვლა, ამ წლების მანძილზე, ისე წარმატებით მოახერხებდა, თქვენ ვერც კი წარმოიდგენთ და გადასარევადაც იცხოვრებდა თავადაც და მისი გუნდიც!! ან სად აქვს „ტვ პირველს“ ვინმეს გადმოსაბირებელი ფული. რა კომენტარები ვიკითხე, რა უხერხულია ეს ყველაფერი.
ანუ, ასე, ერთ წამში შეგიძლიათ მოკლათ და გაატყავოთ ადამიანი და გუნდი, რომელიც ამდენი წელი საუკეთესო და უბადლო შოუს აკეთებდა და არასოდეს უკან არ დაუხევია, არც ერთი კრიზისისას?! . რაც უფრო ასაკი მემატება, სამწუხაროდ, უფრო და უფრო ხშირად ვფიქრობ ხოლმე, რომ ასე დაუნდობლად, საქართველოში რომ შეუძლიათ ადამიანის განადგურება, ისე არსად და უფრო და უფრო ხშირად გამიელვებს ხოლმე კითხვა, ღირს კი ამდენ ნერვიულობად ჩვენი საქმე?
კიდევ ერთხელ მინდა დიდი წარმატებები ვუსურვო „ვანოს შოუს“ „ტვ პირველზე“. შოუს, რომლითაც მთელმა საქართველომ ვიცხოვრეთ ამდენი წელი ტრაგედია ის იქნებოდა, მისი პროექტი საერთოდ რომ არ გასულიყო ეთერში და სანამ ადამიანებს ჯოჯოხეთს მოუწყობთ, იქნებ კარგად დაფიქრდეთ ხოლმე, ვინ რას იმსახურებს“, - წერს ინგა გრიგოლია.
ცნობისთვის, ვანო ჯავახიშვილმა „ტვ პირველზე“ გადასვლის შესახებ საზოგადოებას ასე ამცნო:
„როგორც იცით მთავარ არხზე ფინანსური კრიზისის გამო დაიხურა ჩვენი ყველა გადაცემა და გვქონდა იძულებითი პაუზა. ახალი სეზონიდან შევხვდებით ტელეკომპანია პირველის ეთერში. ველოდებით ჩვენს ერთგულ მაყურებელს „ტვ პირველის" ეთერში, იგივე დღეს და იგივე დროს“.
მოგვიანებით, აღნიშნული ფაქტის შესახებ განცხადება „მთავარმა არხმაც“ გააკეთა.
„ძალიან ვწუხვართ იმ ფაქტის გამო, რომ „ვანოს შოუს“ გუნდმა „მთავარი არხის“ დატოვების და სხვა ტელეკომპანიაში გადასვლის გადაწყვეტილება მიიღო.
მძიმე ფინანსური კრიზისის მიზეზით ივნისის შუა რიცხვებში ჩვენ იძულებულნი გავხდით დაგვეხურა არხის მთავარი პავილიონი, სადაც იწერებოდა ან პირდაპირ ეთერში გადიოდა აპოლიტიკური გადაცემები: „ვანოს შოუ“, „ახალი შაბათის შოუ“, „მთავარი ბიჭები“, „სხვა ნანუკა“, „შენი დილა“, „მთავარი ჭკვიანი“, „მხოლოდ ლელასთან“, „სპორტი დიდ ქალაქში“, „მთავარი დიაგნოზი“, „ლიტერატურული სამკუთხედი“, „ამინდზე მეტი“ და „მთავარი მსოფლიოში“.
პავილიონის შენახვა, მასშტაბური სტუდიების ნაქირავები ტექნიკით აღჭურვა და ადამიანური რესურსით უზრუნველყოფა იმდენად ძვირი ჯდებოდა, რომ ჩვენ, უბრალოდ, ვეღარ შევძლებდით ასეთი კოლოსალური ხარჯების გაწევას. ამიტომ მივიღეთ პავილიონის გაუქმების მძიმე გადაწყვეტილება.
ზემოთ ჩამოთვლილი გადაცემებიდან ყველამ მიიღო ერთნაირი შეთავაზება, რომ გადასულიყვნენ თვითდაფინანსებაზე; საჭიროების შემთხვევაში, შეეკვეცათ ხარჯები; მორგებოდნენ ალტერნატიულ, უფრო მცირე ზომის ლოკაციებს ეთერში გასასვლელად; ახალ რეალობაზე მოსარგებად, შეეტანათ ცვლილებები გადაცემების ფორმატში.
მიუხედავად იმისა, რომ ეს არ იყო მარტივი ამოცანა, ფაქტობრივად, ყველა გადაცემამ თანხმობა განაცხადა შეთავაზებულ ცვლილებებზე.
მაგალითად, „შენი დილა“ კვირების განმავლობაში პირდაპირ ეთერში ეზოდან გადიოდა; მოგვიანებით არხის მთავარი ოფისის გვერდით ჩვენ გამოვყავით პატარა სივრცე და ერთგული მაყურებლისგან დახმარების ფონდზე შემოსული თანხებით მოვაწყვეთ მცირე ზომის სტუდია - ბევრად უფრო მოკრძალებული ზომის, ვიდრე ძველი პავილიონი - საიდანაც ახლა ეთერში გადის „შენი დილა“, „ლიტერატურული სამკუთხედი“, „მთავარი დიაგნოზი“ და ა.შ.
„სხვა ნანუკა“ პავილიონის დახურვის შემდეგ გადავიდა რეალითი-ფორმატზე, შემდეგ სახსრების არარსებობის გამო იძულებული გახდა ივლისში დროებით შეჩერებულიყო, თუმცა ამ პერიოდში ნანუკამ შეკრიბა ახალი გუნდი, მოიძია სპონსორები და სრული თვითდაფინანსებით და განახლებული ფორმატით სექტებმრიდან იწყებს ახალ სეზონს ჩვენს არხზე.
„მხოლოდ ლელასთან“ აგრეთვე გადავიდა რეალითი-ფორმატზე და სტუდიის გარეშე გადის ეთერში.
ერთადერთი გუნდი, რომელმაც განაცხადა, რომ ვერ შეძლებდა „მთავარი არხის“ ახალ რეალობაზე მორგებას და ამისთვის აუცილებელი ცვლილებების შეტანას გადაცემებში, „ვანოს შოუს“ გუნდი აღმოჩნდა. მიუხედავად იმისა, რომ პავილიონის დახურვის შემდეგ ჩვენ მათთან არაერთი დამატებითი საუბარი გავმართეთ, შევთავაზეთ შემცირებული ზომის სტუდიის მოწყობა და შევთავაზეთ დახმარება სპონსორების მოძიებაში, მათ მაინც გადაწყვიტეს ჩვენთან თანამშრომლობის შეწყვეტა და არხიდან წასვლა. როგორც თვითონ განგვიმარტეს, მათ უკეთესი შეთავაზება მიიღეს სხვა ტელეკომპანიისგან.
ვწუხვართ, რომ ჩვენი უმძიმესი ფინანსური მდგომარეობიდან გამომდინარე, ვერ შევძელით „ვანოს შოუს“ გუნდისთვის დამაკმაყოფილებელი პირობების შექმნა. ჩვენ დღემდე გვაქვს მათი სახელფასო დავალიანება, ისევე, როგორც აბსოლუტურად ყველა თანამშრომლის, რომელიც დღემდე მუშაობს „მთავარ არხზე“ - ხშირად ანაზღაურების გარეშე - და მაინც არ ტოვებს კომპანიას.
„ვანოს შოუს“ გუნდს უდიდესი წვლილი მიუძღვის „მთავარი არხის“ შექმნაში, წარმატებასა და მაღალ რეიტინგში. ჩვენ მრავალწლიანი თანამშრომლობა გვაკავშირებს და ამ ადამიანებთან ერთად ურთულესი ეტაპები გვაქვს გამოვლილი. ამიტომ მათი წასვლა არხისთვის ნამდვილად დანაკლისია. ეს ჩვენს ინტერესებში და გეგმებში არ შედიოდა, მაგრამ, სამწუხაროდ, მათ თვითონ გადაწყვიტეს ასე.
„ვანოს შოუს“ გუნდის წასვლის გამო, ჩვენ მუშაობა დავიწყეთ ახალ იუმორისტულ შოუზე - ახალი გუნდით და ახალი წამყვანით, რომლის ვინაობასაც მაყურებელი მალე გაიგებს. გადაცემა სწორედ იმ ახალი სტუდიიდან გავა ეთერში, რომელზედაც უარი თქვა „ვანოს შოუმ“ და ეყოლება ის სპონსორები, რომლებსაც ვთავაზობდით „ვანოს შოუს“.
ნაკლები პოლიტიკა და მეტი იუმორი - ასეთი იქნება ჩვენი ახალი იუმორისტული შოუ, რომელიც ეთერში გავა, რა თქმა უნდა, იგივე დღეს, იგივე დროს და იგივე ადგილზე - ყოველ პარასკევს, 22:00 საათზე, „მთავარ არხზე“, - ნათქვამია განცხადებაში.
„მთავარი არხის“ მიერ გავრცელებულ ამ წერილს ვანო ჯავახიშვილის გაღიზიანება გამოიწვია და მათ სიცრუეში და უნამუსობაში დასდო ბრალი.
ასევე დაგაინტერესებთ:
🔵„ერთგულებაზე და ფინანსებზე გააკეთეთ აქცენტი სტატუსში? ოკ“ - ოთო ლომთაძე „მთავარ არხს“
