„არ არსებობს იმაზე მძიმე სამუშაო, ვიდრე მთელი დღე, დილის 8:00 საათიდან შუაღამემდე ცდილობდე, ლამაზი იყო“... ეს ფრაზა მსახიობ მერლინ მონროს ეკუთვნის.
და მაინც, როგორია იყო ლამაზი, ყველას ყურადღებას იქცევდე და მოდუნების საშუალება არ გქონდეს?
იყო ლამაზი ეს ერთგვარად ჯილდოცაა და წყევლაც - ეს კლიშეა, მაგრამ ფაქტია - ყველა ლამაზი ქალის შურთ მათსავე სქესის წარმომადგენლებს. ხომ არ დაგავიწყდათ მარიტა, რომლესაც ტალახი ესროლეს ან „მალენა“, რომელიც სილამაზის გამო ქუჩაში სცემეს....
დიახ, ეს თავად ქალებმა ჩაიდინეს, პირველი მათ ისროლეს ლამაზი ქალების წინააღმდეგ, რადგან ქალის სილამაზე ყოველთვის იქცევს დიდ ყურადღებას.
დიზაინერი, მაკა ასათიანი ერთ-ერთი ულამაზესი ქალია, რომელიც ყურადღებას ყოველთვის იქცევს და ბევრისთვის ქალის იდეალიც არის.
„დღეს მელიქიშვილზე, „ოცნების“ ოფისის წინ მაკა ასათიანი იჯდა. სასიამოვნო იყო იმის ყურება, როგორ უყურებდნენ ლამაზ ქალს გამვლელები და ლამაზი ქალი როგორ ლამაზად ცდილობდა, არ შეემჩნია ამდენი ცნობისმოყვარე მზერა....“- წერდა ჟურნალისტი ნანა აკობიძე მაკა ასათიანზე.
ტრაგედიები და პირველი ქორწინება
მაკა ასათიანი ცნობილი ოჯახის შვილი გახლავთ, მისი ცხოვრება, სამწუხაროდ, ტრაგედიებითაც იყო სავსე.
მოუკლეს მამა - კახი ასათიანი, მოკლეს ბიჭი, რომელსაც ძალიან უყვარდა - დუდუ დადიანი. ორივე მკვლელობა ბურუსით არის მოცული.
პირველად იქორწინა მერაბ ჟორდანიაზე, რომელთანაც ორი ვაჟი ჰყავს.
მერაბ ჟორდანიას მაკა ძალიან უყვარდა და მისთვის სიურპრიზებსაც აწყობდა, ერთხელ ვერტმფრენიდან ვარდებიც კი მიმოფანტა ქუჩებში, თუმცა, მათი გზები გაიყო.
დიზაინერის გარეგნობას უამრავმა ტრაგედიამ ვერაფერი დაატყო, ის უწინდებურად ლამაზია, თუმცა დაკვირვებული თვალი მის სახეზე სევდასაც ამოიკითხავს.
მეორე ქორწინება
მაკას მეორე მეუღლე კოტე გოგელია იყო.
ის ყოფილი „მხედრიონელი“, ე.წ. ვერის საძმოს წევრი იყო. ამ პერიოდში წამოიწყო მან საქართველოში ნავთობის ბიზნესი. საქართველოდან კოტე გოგელია რუსეთში წავიდა, სადაც კაპიტალის დაგროვებას შეუდგა. ამჟამად კოტე გოგელია ფლობს კომპანია „პროგერტას”, რომლის ტერმინალები ნოვოროსისკში მდებარეობს.
ასევე, ფლობს კომპანია „კომანდიტსერვისს”, რომელიც ქვანახშირის წარმოებით არის დაკავებული, მას აქვს რამდენიმე კაზინო რუსეთში.
როგორც რუსული გამოცემები წერენ, გოგელიამ რუსული ხელისუფლების ზედა რგოლის წარმომადგენლებთან მეგობრობით გაიკვალა გზა.
საზოგადოებისთვის კოტე გოგელია მაკა ასათიანის მეუღლის სტატუსის გარდა, პოლიტიკურ ასპარეზზე „ქართული პარტიის“ სახელით გახდა ცნობილი. ის გარკვეული პერიოდის განმავლობაში „ქართული პარტიის“ საკმაოდ აქტიურ ლიდერად ითვლებოდა. იმ პერიოდში გოგელია ირაკლი ოქრუაშვილის აქტიურ მხარდამჭერად და თანამოაზრედ სახელდებოდა.
თუმცა, მათი ურთიერთობები მაშინ დაიძაბა, როცა გოგელია პარტიიდან გარიცხეს. გადაწყვეტილება „ქართული პარტიის“ პოლიტსაბჭომ მიიღო. გოგელიას გარიცხვას წინ უძღოდა სოზარ სუბარის მიერ პარტიის დატოვება. ამ ფაქტს საკმაოდ დიდი ხნის განმავლობაში ასაიდუმლოებდნენ, თუმცა კულუარებში დაპირისპირების რეალურ მიზეზსაც ასახელებდნენ – „მაესტროს“ 25 %-იანი წილი.
მათ ერთი შვილი, კოსტა გოგელია ჰყავთ.
ბებიობა
ბებიაზე როგორი ქალები გახსენდებათ? მე ხანშიშესული, სხვაზე მზრუნველი, ჩურჩხელებით და ძველი, მათი დროის ისტორიებით შეიარაღებულები.
ჰო, ბებოზე ყოველთვის ასეთი წარმოდგენა მქონდა, მაგრამ როგორია იყო მაკა ასათიანის შვილიშვილი ამაზე პასუხს ვერ გაგცემთ.
ალბათ, დიდი პატივია გერქვას მისი შვილიშვილი... თანაც უეჭველად გენდომება ბებიის გენეტიკაზე წასვლა...
მაკას უფროს ვაჟს, კახი ჟორდანიას და ნანიკო კლდიაშვილს გოგო, პატარა ლეა ჰყავთ, რომელიც 2020 წლის თებერვალში დაიბადა.
კახი და ნანიკო სამი წლის წინ დაქორწინდნენ, ისინი შვეიცარიაში ცხოვრობენ, თუმცა, როგორც ცნობილია, კორონავირუსის პანდემიის შემდეგ, დროს საქართველოში ატარებენ.
უცნობი ისტორია
ტელეკომპანია „მაესტროს“ ყოფილი გენერალური დირექტორი, ბაია გადაბაძე, რომელიც მაკა ასათიანის ახლო მეგობარია, მის შესახებ უცნობ ისტორიას იხსენებს.
გთავაზობთ ამონარიდს ჟურნალ „თბილისელებიდან“:
„კანის კინოფესტივალზე ვიყავით მე და მაკა საქმიანი ვიზიტით სხვადასხვა კინოფილმის საყიდლად.
მოგეხსენებათ, კანში უამრავი ვარსკვლავი ჩადის და სილამაზე არ უკვირთ. მაგრამ ქუჩაში რომ მივდიოდით, ეს იყო საოცრება. უცხო ხალხი აჩერებდა მაკას, კომპლიმენტებს ეუბნებოდნენ და სურათებს იღებდნენ მასთან ერთად და უკვე ისე გავრცელდა, ტაქსიში რომ ჩავჯექით, ტაქსის მძღოლმა ჰკითხა, თქვენზე ლაპარაკობენო?
საღამოს წავედით სავახშმოდ ერთ-ერთ რესტორანში და ვხედავ, წინა მაგიდასთან სხედან მამაკაცები და ძალიან ბევრი ხალხი მიდის, ფოტოს იღებენ მათთან.
მივხვდი, რომ სელებრითები არიან, მაგრამ ვერ მივხვდი, ვინ იყვნენ. აღნაგობის მიხედვით დავუშვი, რომ ფეხბურთელები იყვნენ. ვართ მე, მაკა, მაკას მეუღლე - კოტე და ჩვენი რამდენიმე მეგობარი.
უცებ მოდის რესტორნის მფლობელი, რომელიც მაკას იცნობდა და რაღაცას ეუბნება ფრანგულად. მაკა ცოტა გაშრა.
ვეკითხებით, რა მოხდაო და იმ სუფრაზე რომ კაცია, იმას უნდა მოსვლა და კომპლიმენტის თქმა ქალბატონისთვის, თუ სუფრასთან მსხდომი მამაკაცები არ იქნებიან წინააღმდეგიო. ყველამ კოტეს შევხედეთ.
კოტემაც - არ ვიქნები წინააღმდეგი, თუ კომპლიმენტის თქმა უნდა, მე რა მაქვს საწინააღმდეგოო, ხანშიშესული მამაკაცი მოვიდა და დაიწყო ლაპარაკი, რომ მე ჩემს ცხოვრებაში მსგავსი სილამაზის არავინ მინახავს და მინდა, ჩემი დიდი მოწონება გამოვხატოო - დაიღვარა კომპლიმენტებად, ლამის დაიჩოქა და ჩვენც ძალიან ამაყები ვიყავით.
ეს კაცი იმ მაგიდიდან მოვიდა, სადაც ფოტოებს იღებდნენ და ვკვდები ინტერესით, ვინ არის.
მაკას ვუთხარი, დაუძახე რესტორნის მფლობელს, ჰკითხე, უნდა „დავგუგლო“, თორემ გავგიჟდები, რომ არ გავიგო, ვინ არის ეს კაცი-მეთქი.
ვწერ სახელს და გვარს „გუგლში“ და ვინ აღმოჩნდა? - კლუბ „ბარსელონას“ მფლობელი.
მერე კარგა ხანს „ბარსელონას“ ვეძახდით მაკას“,- ამბობდა გადაბაძე.
როგორც მეგობრები ამბობენ, მაკა არამხოლოდ ფიზიკურადაა ლამაზი მისი სულიც მშვენიერია, შესაბამისად, ამ ორი ფენომენის სინთეზი მას კიდევ უფრო მეტად ლამაზს და მიმზიდველს ხდის....
აგრეთვე წაიკითხეთ:
კენედის ბრალია ცოლი რომ მოვიყვანე - ბუბა კიკაბიძე
ბედნიერი თავისი ცხოვრებით არავინ არ არის - ლიანა ასათიანის სიმდიდრე, სევდა და მარტოობა
ნაადრევად დატოვებული სიცოცხლე და შეფუთნილი ლენინის უცნობი ისტორია - ცოტა რამ რამაზ გიორგობიანზე
