ცნობილი ნუტრიციოლოგი და კვების ფსიქოლოგი ნატა გაგუა სოციალურ ქსელში წერს, რომ წონის კლება ნებისყოფის გამომუშავება კი არა, მოქნილი სისტემის შექმნაა.
იგი საზოგადოებას ცხოვრების წესისა და ფსიქოლოგიის კორექციისთვის 7 სტრატეგიას უზიარებს:
„წონის კლება ნებისყოფის გამომუშავება კი არა, მოქნილი სისტემის შექმნაა.
თუ თქვენი მიდგომა მხოლოდ საკვების აკრძალვას ეფუძნება, თქვენ მარცხისთვის ხართ განწირული. წარმატება მიიღწევა არა დროებითი მიზნებით, არამედ ყოველდღიური, მოქნილი სისტემებით. თქვენ უნდა შეცვალოთ არა მხოლოდ ის, თუ რას ჭამთ, არამედ — როგორ ფიქრობთ, როგორ გძინავთ და როგორ მოძრაობთ.
გაგიზიარებთ 7 სტრატეგიას ცხოვრების წესისა და ფსიქოლოგიის კორექციისთვის:
1. უზმო ინტერვალი (მაგ. 16/8): ეს არ არის მხოლოდ კალორიების შეზღუდვა. ეს არის ჰორმონალური „გადატვირთვა“. როცა არ ჭამთ 16 საათს, ინსულინის დონე რეგულირდება და სხეულს აძლევთ შანსს, ენერგიისთვის დაგროვილი ცხიმი გამოიყენოს.
2. იმოძრავეთ სიხარულისთვის (და არა სასჯელად): შეწყვიტეთ ვარჯიში, თუ ეს პროცესი თქვენთვის ტანჯვაა. გადაჭარბებული, იძულებითი კარდიო ზრდის დისტრესს (კორტიზოლს) და ბლოკავს შედეგს. იცეკვეთ, ისეირნეთ, იპოვეთ ვარჯიშების სისტემა, რომელიც არ გბეზრდებათ.
3. დაეუფლეთ დოფამინის ალგორითმს: კვების ინდუსტრიამ იცის „ნეტარების წერტილი“ (შაქრის, ცხიმის და მარილის კომბინაცია), რომელიც ტვინის ჯილდოს სისტემას ააქტიურებს. გააცნობიერეთ: პირველი ლუკმა ყოველთვის მაქსიმალურ სიამოვნებას განიჭებთ. ყოველი შემდეგი ლუკმა სულ უფრო ნაკლებ დოფამინს გამოყოფს. დატკბით პირველი ლუკმით და შეწყვიტეთ ჭამა 15-20 წუთით. გაგაოცებთ შედეგი.
4. შექმენით სისტემა (და არა მიზანი): მიზანი („მინუს 10 კგ“) დროებითია. სისტემა („ყოველ დილით ყავის მოდუღების შემდეგ ვსვამ ერთ ჭიქა წყალს“) მუდმივია. გამოიყენეთ „ჩვევების გამომუშავების“ მეთოდი.
5. გაშიფრეთ ლტოლვები: აკვიატებული ლტოლვა ხშირად არა კალორიების, არამედ მიკრონუტრიენტების (მაგ. B ვიტამინები, რკინა, მაგნიუმი) დეფიციტია.
6. ძილის პრიორიტეტი: ძილის ნაკლებობა = შიმშილის ჰორმონების (გრელინის) ზრდა და მეტაბოლური სტრესი. დაძინებამდე 2 საათით ადრე მოიშორეთ ეკრანების ლურჯი სინათლე, რომელიც ძილის ჰორმონს (მელატონინს) თრგუნავს.
7. უარი „დიეტურ მენტალიტეტზე“: საკვების „კარგ“ და „ცუდ“ კატეგორიებად დაყოფა ქმნის მანკიერ წრეს (აკრძალვა -> დანაშაულის გრძნობა -> უკონტროლო ჭამა). ისწავლეთ ინტუიციური კვება და დაუზავდით საკუთარ სხეულს.
შედეგს აღწევ მაშინ, როცა საკვები ხდება არა მტერი, არამედ მოკავშირე თქვენი ჯანმრთელობის გზაზე“, - წერს ნატა გაგუა.
ასევე დაგაინტერესებთ:
⭕„დაწყებულ საქმეს ღირსეულად აგრძელებს, ინარჩუნებს და ავითარებს!“ - მარინა ეზუგბაია იუბილარია
